Монгол Улс түүхэндээ анх удаа бүх нийтийн бэлэн байдлын зэрэг буюу хатуу хөл хориог тав хоногийн хугацаатай тогтоолоо. Бид урьд өмнө нь учирч байгаагүй, үзэж туулаагүй шинэ нөхцөл байдалтай нүүр туулсан нь энэ. Мөн өнөөдрөөс эхлэн шаардлагатай салбарын ажилтан, алба хаагч биш бол хүнс цуглуулах, эмнэлгийн яаралтай тусламж авахаас өөр шалтгаанаар гадуур гарахгүй байх шийдвэрийг УОК гаргасан  билээ. Энэ өдрүүдийг хэрхэн туулахаас, коронавирусийн халдвар авсан хүмүүсийг хэдий хугацаанд олж тогтоохоос хорио цээрийн дэглэмийг цаашид үргэлжлүүлэх эсэхийг шийднэ. Иймээс үүнд иргэн бүрийн оролцоо нэн чухал юм.

            Та яг одоо буйдандаа шигдэн, удирдлагаараа суваг эргүүлэн сольж, дуртай киногоо үзэн, аль эсвэл хүүхдүүдтэйгээ тоглон, халуун дотно яриа өрнүүлэн, хоол хийж, гэрээ цэвэрлэж суугаа бол эмч, цагдаа, цэрэг, онцгойгийнхон өндөржүүлсэн бэлэн байдалд, уржигдар ч, урд шөнө ч унталгүй, одоо ч амралгүй ажилласаар буй. Тэд иргэдийнхээ эрүүл мэнд, улс орныхоо аюулгүй байдлын төлөө унтах нойроо хугаслан, идэх хоолоо хагаслан, үр хүүхэд, аав, ээж, хань ижилтэйгээ хамт байх эрхээсээ татгалзан ажиллаж байна. Мэдээж, энэ бол тэдний сонгосон мэргэжил, тангараг өргөсөн ажил. Гэхдээ энэ нь бас тэдэнд талархлаа илэрхийлэхгүй байж болно гэсэн үг биш.

            Эмч, сувилагч нар өвчтөнөө эмчлэх, асрах ажлаасаа хором ч холдолгүй шөнөжин ажиллахын зэрэгцээ вирус судлаач нар эмнэлгийн халаад, тусгай хувцастайгаа ширээ дэрлэн хагас дутуу нойр авч, шинжилгээ авсан иргэд нь коронавирустэй байх вий хэмээн амьсгалаа хүртэл түгжих нь холгүй түгшин шинжилгээ хийж байгаа.

            Цагдаа, цэрэг, онцгойгийнхон ч намрын адаг сарын жихүүн салхи хацар хайрч, хөл дааруулавч хүйтнийг үл хайхран халдвар авсан байж болзошгүй хүмүүсийг эрэн хайж, иргэдийг хорио цээрийн дэглэм зөрчих вий, өвчин тусах эрсдэлд өртчих вий хэмээн хэв журам сахиулахаар хоолтой, хоолгүй, нойртой, нойргүй, хөдөлгөөнт болон явган эргүүлийн үүрэг гүйцэтгэж байна. Цагдаагийн алба хаагч нар бүрэн бүрэлдэхүүнээрээ ажиллаж, дотоодын цэрэг, ДХИС сонсогчид нийлсэн 5000 гаруй алба хаагч 24 цагийн үүрэг гүйцэтгэж байгааг холбогдох албаныхан ч уламжилсан.

            Энхийн цагт эх орон тэднийг дуудаж, тэд ч тушаал авсан цэрэг шиг ард иргэдийнхээ эрүүл энхийн манаанд өөрийн биеийг үл хайхран ажилласаар байна. Эмч, цагдаа, цэрэг, онцгойгийнхон бол дэлхий нийтийг айдаст автуулсан коронавирус хэмээх "дайн"-д тулалдаж буй энэ цагийн эрэлхэг баатрууд юм. Тэд ч бас аваал гэргийтэй, ардаа нөхөртэй, аав, ээжтэй, үр хүүхэдтэй, махтай, цустай, эцэж цуцдаг хүн. Тэднийг хэдэн цагт ирэх бол гэж хоолоо байн байн халаан хүлээх эхнэр, нөхөр, хошуу дэвсэн угтах ээж, аав, хуруугаа даран цаг харах үр хүүхэд бий.  

            Өдөр бүр аюултай нүүр тулан ажиллаж буй эмч, цагдаа, цэрэг, онцгойгийнхон та нар маань өөрсдийгөө эрсдлээс хамгаалахаа мартваа. Үүргээ нэр төртэйгээр гүйцэтгэн, энхрий үр хүүхдэдээ, элбэрэлт аав, ээждээ, энэрэлт ханьдаа заавал эрүүл эргэж ирээрэй.  Өргөсөн тангарагтаа, хийж буй ажилдаа үнэнч эрхэм та бүхэнд баярлалаа. Мөн иргэдийнхээ мэдэх эрхийн төлөө микрофон, дуу хураагч барин ажиллаж байгаа сэтгүүлч, камераа үүрэн, хэрэгтэй дүрс бүрийг буулгахыг зорьж яваа зураглаач нар, онцгой нөхцөлд ажиллаж буй худалдагч, эмийн санч, шатахуун түгээгч, цахилгаан станцынхан, харилцаа холбооныхон гээд хүн бүрт баярлалаа. Энэ бүгдийн хариуг иргэн та гэрээсээ гаралгүй, хорио цээрийн дэглэмийг ягштал баримталж хариулахаа ч мартваа. Ингэж байж бид аюулт өвчнөөс өөрсдийгөө, гэр бүлээ, хайртай бүхнээ хамгаалж чадна.