"Урьдынхаараа би өвлийг угтана

Урьдынхаараа буйданд шигдэн цагиргалж уриныг хүлээнэ...",

"Хэцүү энэ шөнийг хэнтэй хуваана

 Хэцүү энэ өвлийг хэнтэй хуваана..." гэх өвлийн тухай мөртүүд нь өдийд яг ахуйд минь ойр оршиж, үе үе амандаа аяархан дуудан уншихад санаа алдуулдаг билээ. Өнөөдөр ч мөн бодолд ойрхон суутал үүнийг бичсэн сэтгүүлчийн төрсөн өдөр тохиож буйг мэдлээ. Тэгээд мэнд дэвшүүлэнгээ түүний тухай бэсрэг тэмдэглэл хүргэж буй минь энэ.

        Соёлын гавьяат зүтгэлтэн, сэтгүүлч Б.Ганчимэгийн туурвисан, өнөөд ч бүтээж буй олон сайхан ярилцлага, хөрөг тэмдэглэл, сэтгүүл зүйн бүтээлүүд нь уншигчдад хэдийнэ дотно танил байхаас гадна залуу сэтгүүлчдэд том үлгэр болдог. Үүний ганцхан жишээ л гэхэд Мэргэжлийн сумогийн 68 дахь их аварга Д.Дагвадоржтой хийсэн “Амьд домог Асашёорюү, эх оронд чинь агаар нь тачигнасан омголон өвөл болж байна” гэх ярилцлага нь. Сэтгүүл зүйн шилдгүүдэд олгодог Ц.Балдоржийн нэрэмжит шагналыг хүртэж байсан энэ ярилцлага ард түмний сэтгэлд дуу шиг л хоногшсон. Их аваргын сэтгэлд өрнөх бүхнийг тэр хүмүүсийн өмнө онгойлгон дэлгэсэн. Ер нь ч  тэгээд яг ийм “цуутай” бүтээл түүнд олон бий дээ. Урлаг соёл, улс төр, бизнесийн томчуудаас эхлээд эгэл жирийн ажилч хөдөлмөрч хүмүүс гээд түүний ярилцлагын ширээнд уригдаж, сэтгэлээ уудлаагүй хүн тун ховор байх. Эдгээр олон зочнынхоо яриаг багтаасан ярилцлагын "Ярилцъя", "108" асуулт, хариулт" гээд номууд ч бий. Мөн "Бүүр түүр”, “Он жилүүд минь”, “Урьдынхаараа би өвлийг угтана”, “Би ч гэсэн буруутай”,  “Goodbye My Love”,  “Аав бид хоёр” зэрэг ном хэвлүүлсэн байдгийг уншигчид нь одоо ч амтархан эргүүлж буй.  Уншигч миний хувьд гэхэд түүний бүтээлүүдээс “Аав бид хоёр”, “Ээж бид хоёр”, “Шар туяа”, “Гүүгээ”, “Дэлдэн мөөг”, “Намрыг налаад л баймаар” зэрэг хөрөг тэмдэглэлүүд нь сэтгэлийн дотор үргэлж эргэлдэж, олж сонгосон дүр, тэдгээрийг тодотгох онож буулгасан үгсээс нь суралцах том хичээл болдгийг энд мөн талархан дурдмаар байна.

       Тэрбээр анхдагчдын нутаг болох Булган аймгийн Дашинчилэн сумынх, аав нь холбооны инженер, ээж нь холбооны техникчин байсан гэдгийг бид тэмдэглэлүүдээс нь хэдийнэ мэднэ. Ерөөс амьдрал, ахуйгаа тэр илхэн биччихдэгийг ч гадарлана байх. Өдөр тутмын сонины халуун тогоонд олон сайхан уран бүтээлчидтэй мөр зэрэгцэн ажиллаж, тэнд хүн болсноо ч бахархан ярьдаг. Анх ажлынхаа гарааг “Ардын эрх”-ээс эхэлж, “Өдрийн сонин”,  “Үндэсний шуудан” сонины тоймчдын албаны дарга, долоо хоног тутмын “Нээлттэй хаалга” сонины ерөнхий эрхлэгч, Үндэсний мэдээллийн МОНЦАМЭ агентлагийн дарга гээд энэ хугацаанд тэр сэтгүүл зүйгээсээ, бичгийн ширээ, тэмдэглэлийн дэвтрээсээ огтхон ч холдоогүй. Өдгөө бүр дүрэлзэн асаж, "Interview" сэтгүүлийн ерөнхий эрхлэгчээр ажиллаж, залуусаа дагуулан уртай, иртэй бүтээлүүдээ уншигчдадаа хүргэсээр буй. Тэгээд бүр оны шилдгийг шалгаруулах “Ган үзэг-2024” наадмын шилдэг сэтгүүлээр шалгарсан амжилттай байгаа. Ийм нэг сайхан сэтгүүлч, суралцан унших автор бидний дунд бий.

     Магад энэ хүртэл уншсан уншигч та “Угаас Б.Ганчимэг сэтгүүлчийг мэднэ ээ”  гэж байж ч мэдэх юм. Тэгвэл “Шүлгийг нь та хэр мэдэх вэ” гэж зөрүүлэн асуумаар байна. Намайг л лав юм бүхнээс өндийлгөж, дураараа эрх танхи, зоргоор нэгэн болгодог юм, түүний шүлгүүд. Юунд ч баригдахгүй, өөрийгөө тэмдэглэлийн дэвтэртээ юу ч үгүй уудалчихаад хөнгөрч алхахыг зөвлөдөг юм, тэр шүлгүүд. Өвөл надад цөөн мөрт ойр байдгийн дийлэнх нь түүнийх. Эхлэлд дэх мөртүүдийн үргэлжлэлийг хайж уншаарай. Нэг тийм гэгээн гуниг цээж бүрхээд ирэх вий.

      Түүнд төрсөн өдрийн мэнд хүргэе. Энэ жил ч бас та урьдынхаараа өвлийг угтаж, урьдынхаараа буйдандаа шигдэн байна уу. Эсвэл нүдний шилээ зүүгээд алхаж явна уу. Өө, нээрээ, сэтгүүлийнхээ дараагийн дугаарыг гаргахаар бичгийнхээ ширээнд тухалж байж мэдэх юм. Урьдынхаараа л...