Жил бүрийн энэ үе дэлхийн хамгийн хүйтэн цаг ч дулаахан үйл явдлууд өрнөдөг. Нэг нэгэндээ халуун дулаан үг хэлж, талархсан сэтгэлээ бэлгээр илэрхийлдэг хамгийн сайхан цаг. Бид доорх хүмүүст “Таны авч байсан хамгийн гоё шинэ жилийн бэлэг юу вэ” гэсэн асуултыг тавьсан юм. Харин тэдний хувьд гайхалтай шинэ жилийн бэлэг юу байсан бол?

            Эргээд хартал намайг хараад зогсож байсан нь хөөрхөн

            Хөл хорио эхлээд удаагүй байтал би нэг подкаст сонсоод, оролцсон нэг зочин охин сонирхол татаад, бид хоёр сошиалаар харилцах болов оо. Надад хувь хүн нь их таалагдаад, бичиж байгаа нь ч хөөрхөн. Заримдаа утсаар ярина. Нэг өдөр гэрийн ойролцоо ирээд тааралдъя гээд, хальт уулзчихаад салах үед надад нэг жижигхэн улаан хайрцагтай бэлэг өгснөө “Шинэ жилийн бэлэг. Гэртээ ороод үзээрэй. Нэг их юм биш шүү” гээд цаашаа яваад өгөхөөр нь гайхаад алхаж байгаад эргээд хартал намайг эргэж харахыг хүлээж байсан. Тэгээд бид нэгэн рүүгээ ахиж даллаад өвлийн хүйтэнд хоёр тийшээ салаад явсан. Гэртээ ирээд тэр хайрцгийг нээж үзтэл гоёл чимэглэлийн бугуйвч байсан. Тэр хэлэхдээ “Өнгөрсөн жил хуучин эдлэлийн дэлгүүрт явж байхдаа хараад авч байсан юм. Нандигнаж байгаад чамд өгмөөр санагдаад, нэг тийм гоё бэлгэдэлтэй” гэсэн. Энэ миний санаж байгаагаар авч байсан үнэ цэнтэй бэлэг юм уу даа. Хайрцагтай бэлэг авчихаад, эргээд хартал намайг хараад зогсож байсан нь л хамгийн хөөрхөн санагддаг. Баярлалаа Ж.

Ц.А

Аав гэртээ ирсэн нь хамгийн гоё бэлэг

            Миний хувьд 2004 онд хэсэг хугацаанд салсан байсан аав, ээж хоёр маань шинэ жилийн өдөр буцаж нийлж, аав гэртээ ирсэн нь миний авч байсан хамгийн гоё шинэ жилийн бэлэг дээ. Энэ л үйл явдал аав, ээжийн авч өгсөн бэлэгнээс илүү байсан.

Б.Д

Дүү минь бусадтай хуваахад сургасан

            Би багадаа их уйланхай хүүхэд байсан юм. Цэцэрлэгийн шинэ жилээр өвлийн өвгөнөөс бэлгээ авчихсан баярлаад байж байлаа. Тэгтэл ээж, эгч хоёр манай дүүг дагуулаад ирчихсэн, дүү маань над руу гүйж ирээд бэлгийг минь авчихсан. Тэгээд яагаад ч юм дүү бэлгийг минь шууд авчихлаа гэж ойлгоод, аймаар уйлаад л байсан. Тэр үед авахуулсан  зураг инээдтэй, ув улаан нүдтэй юм байдаг. Дүү маань хөөрхөн инээчихсэн, би уйлчихсан. Маргааш нь бид хоёр бэлгээ хуваагаад л идсэн л дээ. Дүүтэй төрсөн минь юмыг бусадтай хуваахад сургасан юм болов уу гэж боддог доо.

Б.Х

Дотнын хүн дэмжих нь урам зориг өгдөг

Зураг зурж урлагийн аяллаа эхлүүлж байгаа миний хувьд энэ жил найзаасаа зургийн молберт бэлгэнд авсан нь хамгийн их сэтгэгдэл үлдээсэн. Хийж байгаа зүйлийг дотнын хүн маань дэмжих нь илүү их урам зориг өгдөг юм билээ.

Г.У

Хамгийн гэгээлэг дурсамжуудыг бэлгэнд авсаар л байна

Шинэ жилийн хамгийн гоё бэлэг. Энэ асуултыг асууснаас хойш хэдэн цаг гэрийн ажил хийх зуурт, ямар бэлэг билээ гэж байснаа нуух юун. Шууд тэр шүү дээ гэж огт орж ирсэнгүй. Эцэст нь миний хамгийн том бэлэг бол энэ юм байна.

Би бараг ухаан орох цагаасаа л шинэ жилийн баярт л хамгаас дуртай байсан байх. Учир нь баяр дөхөх бүрд манай аав саа, чимэглэлээ гаргаж ирээд хоёр өрөөгөө гоёж гарна. Тэр үед нэг хананаас нөгөө хана хүртэл сунадаг урт өнгө өнгийн цасан ширхгэн хээтэй чимэглэл байдаг байлаа. Би харин хажууд нь хүзүүндээ саа ороогоод аальгүйтэж өгнө. Угаасаа одоо ч тийм хэвээрээ. Гацуур мод маань мөчир, мөчрөөрөө нийлдэг 130 см өндөртэй, тухайн үедээ их л гоё л гацуурхан байдаг байлаа. Орой болгон гэрлийг нь харж унтана. Аав минь цонхон дээр зураг зурна. Ямар гоё зурдаг гээч. Ээж минь дүү бид хоёрт хувцас урлана. Хачин сайхан уран хүн бий дээ. Жил бүрт л ийм гоё өдрүүд өнгөрдөг байжээ. Би жаахан том болоод гурав билүү дөрөвдүгээр ангидаа сургуулиа тарчихаад дүүгээ цэцэрлэгээс нь аваад явлаа. Ямартай ч хоёулаа гэртээ харьчихтайгаа л том болчихсон байсан юм. Тэр үед гэрийнхэндээ бэлэг бэлдэхээр цуглуулсан мөнгөөрөө цэцэрлэгийн хажууд байдаг дэлгүүрт орлоо. Ээждээ уруулын будаг, аавдаа халаасны сам, алчуур, дүүдээ жижиг машин аваад хүн бүрд жижигхэн захиа бичээд орных нь урд тавьчихсан. Өглөө сэрээд бэлгээ хараад яаж баярлаж байгааг нь харах надад хамгийн сайхан байдаг байсан. Олон ч жил бэлэг бэлджээ. Их л жаргалтай өссөн охин юм болов уу даа. Манайх гэдэг айл тухайн үед баян чинээлэг байгаагүй, дундаж л айл байсан. Гэтэл нэг шинэ жилээр мөнгө багатай байсан болохоор аав, ээж хоёр маань сироп найруулаад гоё ундааны шилэнд, цай найруулаад гадаад архины шилэнд хийж тавиад, ээж минь өөрөө наполеон торт хийж гэрийнхээ хамгийн аальгүй охиноо урдаа суулгаж байгаад зураг даруулж, тэмдэглэсэн байдаг юм. Энэ бүх сайхан дурсамж одоо болтол намайг хөглөдөг. Би одоо болтол шинэ жилийн баярыг гэр бүлээрээ сайхан дурсамжтай өнгөрөөх хамгийн гоё баяр гэж боддог. Миний авч байсан хамгийн гоё бэлэг миний бага насны эдгээр дурсамжууд, миний гэр бүл юм байна. Он оны шинэ жилүүдэд би хамгийн гэгээлэг дурсамжуудыг бэлгэнд авсаар л байна. Энэ нандин мөчийг дурсаж ярихад хүртэл инээд тодорч, хайр хүрч байна. Баярлалаа.

Ч.У