• Өнөөдөр 2024-03-28

ДАРЬГАНГЫН БУУРАЛ ТАЛД ЦАГААН ЗЭЭР ҮЕЛЗЭНЭ

2022-11-15,   659

            Ганга нуурт саяхан хун чуулаад буцсан гэнэ.Энэ талаар Өвөрхангай аймгаас Сүхбаатар аймгийн Дарьганга суманд отроор яваа найз минь утас цохиж, сонин сайхан хуучлах зуураа дуулгав.  Ширээ өндөртэй ургасан шаргал өвсийг саяхан орсон цас бууралтуулжээ. Мөн өглөөдөө хяруу унаж, цан цохисон дөрөөг өвсний үзүүр зурж байна гэнэ. Ганга нуурын ус толиотон хөвөөгөөр нь үхэр сүрэг налайж, нутгийн залуус адуу уургалж, амралтаараа гэртээ ирсэн хүүхдүүд хонь хариулангаа гар утасныхаа дэлгэцийг маажиж буй сурагтай. Үүнээс гадна хунгийн чуулган болж буй сургаар хот хүрээнээс олон хүн очиж, автомашинаараа хөрс шороог эмтлэн хойш, урагш давхисан тул тоос шороо нэг хэсэгтээ манаран байжээ. Энэ жил Ганга нуурт олон хун чуулаагүй бөгөөд Дуут нуурт хун чуулсан аж.  Мөн Ганга нуурын усанд үсээ угаасан эмэгтэй хүн хайраар дутдаггүй гэдэг болохоор ч тэр үү бүсгүйчүүд элдэв янзын шампуниар Ганга нуурын усыг бохирдуулсан гэнэ. Энэхүү үзэгдэл ойрын хэдэн жил үргэлжилж буй юм.

Саяхан орсон цас малчдын магнайг тэнийлгээд буй аж. Учир нь адуу, мал услахаар нэг хэсэгтээ л худгаас ус ховоодон татахааргүй болсон гэнэ

            Харин Алтан-Овооноос 70 гаруй километрын зайд орших Шилийн Богдын ойр орчимд адуу, цагаан зээр хоёр алтран бэлчиж буй гэнэ. Талын агуй, Торой Бандын хөшөө орчимд бороо хуртай сайхан зун болж, ногоо өндөр шимтэй ургасан аж. Тиймээс нутгийн малчид төдийгүй энд тэндээс малчид адуугаа туун ирсэн гэнэ. Зарим нэг айлын азарган үрээнүүд хамраа тажигнуулж, туурайгаа дэвслээд хойш, урагшаа давхиж буй сурагтай. Саяхан орсон цас малчдын магнайг тэнийлгээд буй аж. Учир нь, адуу, мал услахаар нэг хэсэгтээ л худгаас ус ховоодон татахааргүй болсон. Нуруу нь тэнийсэн нутгийн малчид хятад мотоциклоороо цагаан зээр хөөж, бахардан унахаар нь хүзүүг мушгиад л авлаж байгаа сурагтай.  

Өвлийн эхэн сарын жихүүн салхи үлээгээд эхэлсэн ч нутгийн малчид энгэр зайтай хөвөнтэй дээлтэй таваргаж яваа аж.

            Ганга нуурт шөнийн саран тольдож, хөвөөгөөр нь идшиндээ цатгалдсан үхэр мөөрч, адуун дуу янцгааж, юунаас ч юм үргэсэн зээрийн төвөргөөн газар чичгэнүүлэн давхиж байна гэнэ. Сарны бүдэг туяанд шаргал талын толгод торолзож, өвсний үзүүр хуйлран байх мөн ч сайхан. Сөл өвс боловсорч гүйцсэн арвайн түрүү шиг бөхийж, уул толгодын орой мөнгөн хяруунд хучигдаад диваажингийн орон лугаа буй гэнэ. Өвлийн эхэн сарын жихүүн салхи үлээгээд эхэлсэн ч нутгийн малчид энгэр зайтай хөвөнтэй дээлтэй таваргаж яваа аж.

            Сул сугсрах өвсөн дунд цагаан зээрийн зоо улааран, шаргалтаж буй. Хэдэн мянган зээр хөндий талын өвсөнд дунд налайж, хэд хоноод л Ганга нуурыг бараадан очиж байгаа даа. Хэдэн жилийн өмнө яг өдийгөөс арванхоёрдугаар сарын эхэн хүртэл хөндий талд буун дуу тачигнуулан хэдэн зээрээ хядаж байлаа. Гэтэл одоо буун дуу тажигнуулахаасаа илүү хятад мотоциклоороо хөөж, бахардан унаагаад төвөггүй хядаж байгаа гэнэ дээ. Мөн хүйтрэх тусам өнгө ордог талын цагаан чоно сорлож, тарган зээр зооглоод тал дундуур хөнгөн гэгч нь шогшиж явна. Үүнээс гадна Дарьгангын буурал талд энэ жил найр хурим өмнөх жилүүдээсээ их болж, хурим найрт очсон нутгийн малчид хоёр, гурваар нь хурдан удмын адуу шинэхэн хосуудад бэлэглэж байна гэнэ.

            Эх орны зүүн урд хязгаар, наран мандах нутагт өвлийн эхэн сар гарчээ. Малчид өвөлжөөндөө буусан бөгөөд нутгийнхан “Өнөтэй сайхан өвөл болно”  хэмээн ам уралдан ярьцгааж байгаа гэнэ. Адуугаар алдартай Сэцэн хан аймгийн залуус өдөржин адуу уургалж, найр хуримд уригдаж, шөнө сумын төвийн дэлгүүрээс авдар, авдраар нь айраг авч найрлаж суудаг гэнэ. Энэ жил сайхан зун болсон тул цагаан зээр өмнөх жилүүдээс олон тоогоор тус нутагт орж иржээ. Жаргах нарны улаан туяанд өвс хугалан, тоос манарган давхих цагаан зээрийг харах мөн сайхан даа. Толгодын дунд үелзээд л, дэвхрэн үсрээд л, зоо нуруу нь шаргалтаад л сайхандаа, сайхан.   

Дарьгангын буурал талд энэ жил найр хурим өмнөх жилүүдээсээ их болж, хурим найрт очсон нутгийн малчид хоёр, гурваар нь хурдан удмын адуу шинэхэн хосуудад бэлэглэж байна гэнэ.


ДАРЬГАНГЫН БУУРАЛ ТАЛД ЦАГААН ЗЭЭР ҮЕЛЗЭНЭ
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188