Дэлхийн багш нарын 28, Монголын багш нарын 56 дахь удаагийн баярын өдөр өчигдөр тохиолоо. Эл баярыг тохиолдуулан бид шавь нарынхаа төлөө бүхий л зүрх сэтгэлээ зориулж, эрдмийн их харгуйд хөтөлдөг багш нарыг энэ удаагийн “Ажлын ширээ” буландаа онцоллоо.

234 дүгээр цэцэрлэгийн багш Ц.БУЯН-ӨЛЗИЙ: Хүүхдүүд үргэлж хажуугаар нь гүйлддэг болохоор шавь нарынхаа аюулгүй байдлын төлөө ширээн дээрээ юу ч тавьдаггүй

Цэцэрлэгийн багшаар 13 дахь жилдээ ажиллаж буй 234 дүгээр цэцэрлэгийн багш Ц.Буян-Өлзий. Түүнтэй уулзахаар ангийнх нь хаалгыг тогшиход олон хүүхдийн дуу чимээнд хэдийнэ дассан гэмээр нүд нь гэрэлтээд л хүүхдүүдээ эрхлүүлж, зураг зуруулж байв. Цэцэрлэг тарах цаг дөхсөн учир эцэг, эхчүүд ээлж дараалан орж ирж, хүүхдээ хөтлөөд гарна. Хүүхдүүд гэртээ харьж түүнийг түр амсхийх зуур ажлын ширээтэй нь танилцаж,  цөөн хором ярилцав.

     Ц.Буян-Өлзий багш "Би дөрвөн хүүхэдтэй алдарт эх, олон хүүхэд бужигнасан газар байх миний сонирхол юм шиг байна лээ. Анх тэр хүсэлдээ хөтлөгдөөд цэцэрлэгийн багшаар ажиллаж эхэлсэн. Эхний хоёр жил шантраад уйлж байсан үе зөндөө бий. Тэр үедээ өөртөө жаахан л тэсэх хэрэгтэй гэж хэлдэг байсан. Тэгээд цаг хугацаа өнгөрөх тусам ажилдаа дасаж, дадлагажиж, жаргаж ажиллаж байна.  Цэцэрлэгийн багшийн ширээн дээр элдэв чамин зүйлс байрлаж, чимэглэх боломжгүй. Учир нь хүүхдүүд үргэлж хажуугаар нь гүйлддэг болохоор шавь нарынхаа аюулгүй байдлын  төлөө ширээн дээрээ юу ч тавьдаггүй. Харин түүний оронд хүүхдүүд тоглоход тохиромжтой тоглоомоор ангиа тохижуулдаг. Түүний нэг нь манай “Хүүхэлдэйн театр” юм. Хүүхдүүд маань энэ театртаа их дуртай. Хүмүүс багш нарыг олон хүүхдийн дунд их стресстэй, зовдог гэж ярих нь их. Гэхдээ үнэхээр сэтгэлээсээ энэ мэргэжилд дурласан хүний хувьд ажлаасаа маш их аз жаргал, эрч хүчийг авдаг.  Олон хүүхдийн цангинасан инээд, өхөөрдөм ааш дунд өдөржин хамт байх хэчнээн сайхан гэж санана" гэв.

Монгол гуравдугаар сургуулийн бага ангийн багш  АБТА Б.ГАНТУЛГА: Би ширээгээ эмх цэгцтэй байлгах дуртай

  Тэрбээр "Би ширээ болон ханын шүүгээгээ  хаана юу байгаа нь ойлгомжтой эмх цэгцтэй байлгах дуртай. Миний ширээн дээр өдөр тутамдаа сурагч нартаа хэрэглүүлдэг материалаа хийсэн бичгийн хавтас,  хоёрдугаар ангийн сурах бичиг, сурагчдын ирцийн бүртгэл, үзэгний сав байдаг. 

     Харин энэ хажуугийн сагсанд  шугам, хайч, цаасны цавуу, шохой зэрэг хичээлийн хэрэгсэл бий. Орой  ажил тараад, хураагаад явахад амар, олон зүйлд сатаарч цагаа алдахгүй цэгцтэй амар байдаг.  Өнөөдөр нэмэлтээр шавь нарын надад хийж өгсөн бэлэг байна. Бага аншийн багшаар ажлаад 20 гаруй жил болсон байна.  Олон хүүхдийн амьдралын суурийг тавьж өгнө гэдэг сайхан шүү дээ" гэсэн юм.

МУБИС-ийн МБУС-ийн Биологийн тэнхмийн эрхлэгч Ж.АРИУНБОЛД: Миний ширээ энгийн хүн харахад эмх замбараагүй харагдаж мэдэх ч судлаачийн хувьд судалгааны их талбар

    Ж.Ариунболд багш "Би хүүхэд ахуй цагаасаа л байгаль, амьтан, ургамал их сонирхдог байсан. Тэгж  явсаар илүү гүнзгий судалмаар санагдаад биологийн мэргэжлээр суралцаж, МУБИС-ийн Биологийн тэнхимд багшлаад 21 жил болж байна. Энэ хугацаанд судлахад хамгийн сонирхолтой байсан амьтан бол “Сарьсан багваахай” байсан. Манай тэнхимийн багш нар жилийн дөрвөн улирал амрах сөхөөгүй судалгаагаа хийж байдаг.  Оюутнууддаа хичээлээ зааж дуусаад, өрөөндөө орж ирээд судалгаандаа ордог. Нэг эхэлхээр дуусгамаар санагдаад, үүр цайтал суух үе  ч бий" гэж хэрхэн ажилладаг тухайгаа ярьсан юм.

            Харин тэрбээр ажлын ширээнийхээ талаар "Миний ширээн дээр бусад хүмүүсийнх шиг сонин содон зүйлс байхгүй.  Биологийн судалгааны ном, сурах бичгүүд,  тоног төхөөрөмж, судалж буй амьтад зэрэг  ихэнхдээ байдаг.  Өнөөдөр шинэ төрлийн загас судлаад л сууж байна. Судлаач хүний ажлын ширээ ийм л байдаг даа.  Миний ширээ энгийн хүн харахад эмх замбараагүй харагдаж мэдэх ч судлаачийн хувьд судалгааны их талбар юм" гэнэ.