"Сүхбаатар аймгийн Эрдэнэцагаан сумын цэргийн ангид дэглүүлсэн хоёр цэрэг хагалгаанд орохоор болсон” гэх мэдээлэл цахим орчинд тархаад байгаа билээ. Тиймээс бид дэглүүлсэн гэх цэргийн ар гэртэй холбогдож дараах тодруулгыг авлаа. Дэглүүлсэн цэргийн нэгнийх нь авга эгч “Өнгөрсөн тавдугаар сард дүү маань цэрэгт татагдаж, алба хаахаар явсан. Гэтэл гурван сар хүрэхгүй хугацаанд хүнд хагалгаанд орох боллоо. Цэргийн ангид айдас хүрмээр хачин хачин зүйл их болж байна. 

Эрүүл саруул хүүхэд цэрэгт татчихаад эрэмдэг болгож байгаад харамсаж байна. Дүүгээ яагаад хагалгаанд орох болсон талаар асуухад цэргийн ангид хариулт өгөх хүн олдоогүй. Ам дамжсан ярианаас дэглүүлсэн гэх мэдээлэлтэй болсон. Энэ талаар даргаас нь асуухад нэг дугаар өгөөд “Ийшээ яриад мэдээлэл ав” гэсэн. Өмнө нь биднийг эргэлтээр очиход мөн уулзуулж байгаагүй. Гэтэл хэдхэн хоногийн өмнө цэргийн ангиас утсаар ярьж “Хүү чинь хагалгаанд орохоор болсон” гэсэн.

Бид Цэргийн госпитальд ирж дүүгээ төмсөгний судасны бүдүүрэл гэх оношоор хагалгаанд орох гэж байгааг мэдлээ. Хамт дэгдлүүлсэн нөгөө цэргийн онош мөн адилхан гэсэн. Биднийг дүүтэй минь 10-аас илүү минут уулзуулаагүй, бараг л хөөгөөд гаргасан. Дүү маань цэрэгт явснаас шоронд ороогүй шүү дээ. Үнэхээр гомдолтой байна. Өнөөдөр хагалгаанд орох байсан ч Хил хамгаалах ерөнхий газраас хойшлуулсан. Мөн бидэнтэй огт уулзуулсангүй, өнөөдөр” гэлээ.