Замын-Үүдийн боомт Монгол Улсын зах зээлийн чухал ач холбогдол бүхий обьект. Зөвхөн Замын-Үүдийн боомтоор Монголын нийт импортын бараа, бүтээгдэхүүний 80 хувь, экспортын зургаа орчим хувь нь гардаг. Гэтэл зах зээлийг ид эргэлдүүлж, идэвх оруулж байсан ёстой Замын-Үүдийн боомт гацаанд орж, өдөрт 2000 машин Монголын хилээр нэвтэрдэг байсан бол одоо ердөө 200 орчим машин л орж байгаа гэнэ.

өдөрт Монгол руу орж ирэх ёстой нийт чингэлгийн ердөө 10 орчим хувь нь орж ирж байгаа гэнэ.

ЖОЛООЧИД: АЧАА, ТЭЭВЭР ГАЦААНД ОРЖ, ХИЛ ДЭЭР ДОР ХАЯЖ 14 ХОНОЖ БАЙНА

              Замын-Үүдийн боомт гацаанд орж, хилээр ачаа, бараа орж ирэхгүй байгаа гэх асуудлаар тээврийн жолоочидтой холбогдож, цөөн асуултад хариулт авлаа. Жолоочдын хэлж байгаагаар ачаа, тээвэр гацаанд ороод удаж байгаа, гэрээгээр ажиллаж байгаа болохоор дарааллаа хүлээж, дор хаяж, 14 хонож байна гэсэн юм.

-Жолооч Б.Д: Хилээр орж, гарах тээврийн машины дараалал маш их байна. Энэ дараалал удаан үргэлжилж байгаа. Тэр чинээгээрээ л ачаа, тээвэр гацчихаад байгаа юм. Нэг удаадаа л хилээр нэвтрэх гэж дорж хаяж 14 хоног дугаарлаж байна.

-Жолооч С.П: Хил нэвтрэх дарааллаа хүлээгээд яг 20 хонож байна. Өмнө нь ингэж ачаалал болж, дараалж байсангүй, гайгүй л байдаг юм. Гэтэл яг ид үедээ ийм хүнд байдалтай боллоо. Уг нь мэддэг дарга, цэрэг нь энэ асуудлаа шийдмээр байгаа юм. Гэтэл аль аль нь байхгүй, сураг чимээгүй л байна. 

ГААЛИЙН ЕРӨНХИЙ ГАЗАР: Гааль дээр гомдол, зөрчил илрээгүй. Хилийн цэргийн ангид асуудал гарсан байж магад

Замын-Үүдийн боомт дээр гацаж, дарааллаа хүлээн зогсож байгаа тээврийн жолооч нарын хэлснээр гааль дээр гацаанд ороод байгаа аж. Харин энэ асуудлаар ГЕГ-ын мэргэжилтнээс тодруулахад “Манай талаас асуудал байхгүй. Ямар нэгэн гомдол ирээгүй. Замын-Үүдийн гааль дээр гацсан бараа, бүтээгдэхүүн, тээврийн машин, чингэлэг байхгүй. Харин хилийн цэргийн анги дээр асуудал гарсан байж магад” гэсэн юм. Харин Замын-Үүд дэх хилийн цэргийн 0108 дугаар ангийн эрх бүхий албан тушаалтантай холбогдож тодруулахад “Цаг үеийн нөхцөл байдалтай холбоотойгоор гээд БНХАУ-ын талаас хилээр орж, гарах автомашины тоонд хязгаарлалт хийсэн. Дулааны улиралд манай улс барилгын материал болон энэ төрлийн бараа, бүтээгдэхүүнийг бусад улирлаас илүүтэй оруулж ирдэг. Харин энэ үеэр хилийн ачаалал нэмэгдэж, хилээр нэвтрэх автомашины урт дараалал үүсээд байгаа юм.

                     Мөн нүүрсний үнэ буурсантай холбоотойгоор хилээр нэвтрэх гэсэн автомашины тоо ч ихсэж байна. Одоогоор Замын-Үүдийн боомтоор өдөрт 200 машин нэвтэрч байгаа. Хэвийн үетэй харьцуулбал, 200 машин нь ердөө 10 хувь. Харин холбогдох байгууллагуудаас ирэх есдүгээр сараас хилийн ачаалал буурна гэх тооцоолол гаргасан байна лээ” гэв.

     “Замын-Үүд боомт дараалал ихтэй, нэвтэрч чадахгүй байна. Бараа замдаа ирж байгаа” гэх яриа жолооч нар, иргэдийн дунд байнга яригддаг ярианы  сэдэв болоод удлаа. Өнгөрсөн хоёрдугаар сард л гэхэд иргэдийн зүгээс Эрээний боомтоос ачсан чингэлэгүүдийг Замын-Үүд дээр буулгаж, нэг бүрчлэн задалж байгаад бухимдаж байгаагаа илэрхийлж байсан. Мөн хэдэн зуун машин Замын-Үүд боомтоор гарч чадахгүй, гацсан тухай олон нийтийн сүлжээнд нийтэлж байсан удаатай. Хэрэв цаашид Замын-Үүд боомтын ачаалал ихэсвэл, манай улсын бараа, бүтээгдэхүүний эргэлт саармагжих магадлалтай байна.