“Ерөнхий боловсролын сургуулийн 6-12 ангийн сурагчид төгсөлтийн шалгалтад орохдоо заавал 2B харандаа ашиглах ёстой” гэх мэдээлэл цахим сүлжээнд тархаж, иргэд  ихээхэн бухимдалтай байна. Үүнээс үүдэн бичиг хэргийн дэлгүүрүүдээр 2B харандаа хайсан хүмүүсийн цуваа тасрахгүй байгаа  гэх мэдээлэл бий. Бид энэ талаар бид мэргэжлийн байгууллагуудаас тодрууллаа.

Боловсрол, шинжлэх ухааны яамны хэвлэлийн төлөөлөгч Д.Энхжаргал: "Заавал 2B харандаагаар бичнэ" гэх цуурхлаас үүдэн ийм асуудал үүссэн

-Сайн байна уу. Цахим сүлжээнд төгсөлтийн шалгалт болон Элсэлтийн ерөнхий шалгалтын  хуудсыг заавал 2B харандаагаар бөглөнө гэх мэдээлэл бий. Энэ талаар мэдээлэл өгөөч?

            -Боловсрол, шинжлэх ухааны яамнаас тийм мэдээлэл гаргаагүй. Иргэдийн дунд үүссэн цуурхал л ийм асуудал үүсгэж, бичиг хэргийн дэлгүүрт дараалал үүсэж байх шиг байна.

-Тэгвэл шалгалтыг ямар харандаагаар бөглөх заавар, зөвлөмж өгсөн юм бэ?

            -0,5-ын харандаа болон балаас бусад бүх төрлийн  харандаагаар шалгалтын хуудсыг бөглөж болно. Боловсрол, шинжлэх ухааны яамнаас жил бүр төгсөгчдөд шалгалтын үеэр харандаа, баллуур тарааж өгдөг. Тиймээс сурагчид болон эцэг, эхчүүд  тайван байж болно.

-Орон даяар Элсэлтийн ерөнхий шалгалтын бэлтгэл ажил хэдэн хувьтай хангагдсан байгаа вэ?

            -Элсэлтийн ерөнхий шалгалтын бүртгэл орон даяар хаагдаж, суудал, анги танхимын хуваарилалт хийж дууссан. Бэлтгэл ажил 30 хувьтай явагдаж байна.

Боловсролын үнэлгээний төвийн захирал Л.Ганбат: Боловсролын үнэлгээний төвөөс 0.5 харандаа биш, стандарт харандаа ашиглахыг зөвлөж байгаа

 Харин Боловсролын үнэлгээний төвийн захирал Л.Ганбат дараах тайлбарыг өглөө. Тэрбээр "Шалгалтын хариултын шоглоомыг 2B гэдэг харандаагаар бөглө гэж тулгасан зүйл байхгүй. Харин 6-12 дугаар ангийн шалгалтын хуудсыг Элсэлтийн ерөнхий шалгалт өгдөгтэй адил хариултын хуудсыг будна.Үүнийг тестийн тусгай машинаар засаж байгаа. Бидний зүгээс харандаагаар будаж бөглөхийг санал болгож байгаа. Энэ нь ямар давуу талтай вэ гэвэл балаар бөглөсөн тохиолдолд хүүхэд буруугаа засах боломжгүй. Харандаагаар бөглөсөн тохиолдолд буруугаа зөв болгож засах боломж нь хүүхдэд байна. Боловсролын үнэлгээний төвөөс 0.5 харандааг биш стандарт харандааг ашиглахыг зөвлөж байгаа. Гэтэл зарим газар мэдээлэл дамжихад алдаа гарсан уу, зөвхөн 2В харандаа гэдэг буруу ойлголт гарсан байна” гэв.