Хөдөө аж ахуйг дэмжих санд нийлүүлэх улаанбуудайн үнийг өнгөрсөн оны мөн үеэс 60 орчим  хувиар нэмэх шийдвэр гарсан. Үүний улмаас гурил, гурилан бүтээгдэхүүний үнэ 20-30 хувиар нэмэгдэхээр байна. Энэ үнийн өсөлтийн тухайд салбар яамнаас ямар зохицуулалт хийх болон ургац хураалтын явц ямар байгаа талаар Хүнс, хөдөө аж ахуй, хөнгөн үйлдвэрийн яамны Газар тариалангийн бодлогын хэрэгжилтийг зохицуулах газрын дарга Д.Есөн-Эрдэнээс тодрууллаа.

    Тэрбээр ”Монгол Улсын хэмжээнд үр тарианы ургац хураалт 60 гаруй хувьтай явж байна.  Харин төмс хүнсний ногооны ургац хураалт 90 гаруй хувьтай  энэ жилийн дотоодын нөөцөө бүрэн хангах боломжтой байгаа. Энэ жилийн хувьд Засгийн газраас тариаланчдад хөнгөлттэй зээл олгосон нь ургац хураалт сайн байхад эергээр нөлөөллөө. Нийт 100 гаруй тэрбум төгрөгийн зээл олгосон. Үүнээс 27 тэрбум төгрөгийн зээлийг  төмс, хүнсний ногоо тариаланчдад олголоо. Мөн тариаланчдын ургац тариалсан талбайн хэмжээнээс хамаарч мөнгөн шагнал олгож байгаа.

            Энэ жилийн хувьд тариалалтын өртгийн үнэ өссөн учир гурил, хүнсний ногоо өнгөрсөн оноос 20-30 орчим хувиар өсөх магадлалтай байна. Ургамал хамгааллын бодис, бордоо, шатахуун, техник, сэлбэг хэрэгсэл гэх мэт газар тариалангийн үйлдвэрлэлд орж байгаа орцуудын үнэ өнгөрсөн жилүүдтэй харьцуулахад нэмэгдсэн. Тиймээс Хөдөө аж ахуйг дэмжих санд авах улаан буудайны үнийг өнгөрсөн жилийнхээс тодорхой хэмжээнд нэмэгдүүлж авах шийдвэр гарсан юм. Мөн Засгийн газраас баримталж буй Үнэ тогтворжуулах бодлогын хүрээнд үнийн хэт өсөлт үүсэхгүй гэдгийг иргэдэд хэлмээр байна” гэлээ.