Хөвсгөл аймгийн баяр наадамд сумын цолтой бөхчүүдийг барилдуулаагүй гэх мэдээлэл цахим сүлжээнд цацагдаад байгаа билээ. Энэ асуудлаар Хөвсгөл аймгийн баяр наадмыг зохион байгуулах комиссын гишүүн Л.Баярдалайтай утсаар холбогдож тодрууллаа.

        Тэрбээр “Өчигдөр болсон барилдаан Хөвсгөл аймгийн баяр наадмын цол олгох барилдаан биш. Өнөөдөр Хөвсгөл аймгийн 90, 91 жилийн ойн баяр наадмын нээлт болж, бөхийн барилдаан албан ёсоор эхлэх гэж байна. Өчигдрийн барилдаан бол Монголын үндэсний бөхийн холбооны дүрмийн дагуу Дэвжээ.мн-д албан ёсоор бүртгүүлсэн 128 бөхчүүд барилдсан. Түүнд бүртгүүлж амжаагүй хэдэн бөхчүүд эсэргүүцэл үзүүлж барилдуулсангүй гэх маргаан дэгдсэн. Хөвсгөл аймгийн энэ жилийн баяр, наадамд 256 бөх барилдана. Гэхдээ цол олгохгүй гэдгийг аймгийн баяр наадмын комисс шийдвэрлэсэн. Бөхийн барилдаанд улсын цолтой бөхчүүд урилгаар ирж барилдана. Үндэсний бөхийн хуулиар аймгийн наадамд 128 бөх барилдаж, сумын наадамд 64 бөх барилдана гэж заасан байдаг. Хөвсгөл аймгийн наадамд барилдах хүсэлтээ бүртгүүлсэн нийтдээ 300 гаруй  цолтой бөх байсан. Ийм учраас Хөвсгөл аймгийн бөхийн холбоо аймгийн цол олгох 128 бөхийн барилдааныг тусад нь зохион байгуулахаар шийдээд өчигдөр буюу долдугаар сарын 29-ний өдөр барилдаан болсон” гэв.