Ардын хувьсгалын 100, 101 жилийн ой, Үндэсний их баяр наадмын хүчит 1024 бөхийн барилдаан өндөрлөсөн. Барилдааны долоогийн даваанд улсын арслан Ц.Содномдорж улсын зааны даваанд ирсэн Б.Орхонбаярыг амлаж, тахимаа өгсөн. Улмаар хүчит 1024 бөхийн барилдаанд Ховд аймгийн Буянт сумын харьяат О.Хангай түрүүлэн улсын аварга цол хүртэж, Сэлэнгэ аймгийн Цагааннуур сумын харьяат Б.Орхонбаяр үзүүрлэж, улсын арслан цол хүртсэн юм. Ардын хувьсгалын 100, 101 жилийн ойд зориулсан хүчит бөхийн барилдааны талаарх улсын арслан Ц.Содномдоржийн сэтгэгдлийг  тодруулан хүргэж байна.

    Тэрбээр “Энэ жилийн наадмын барилдаанд сэтгэл хангалуун байна. Шижигнэсэн сайхан залуу бөхчүүд улсын цол авч Монгол түмнийгээ баясгаж, өргөн дэлгэр наадлаа. Миний хувьд залуу бөхчүүдийг дэмжсэн. Учир нь тэд чинь бидний залгамж шүү дээ. Бэлтгэл сургуулилтаа сайн хийж, тасралтгүй хичээж чадвал бүх цолыг авах боломжтой гэдгийг батлан харуулсан жил байлаа. Цаашдаа ч гэсэн залуу бөхчүүд олноор төрөн гарах байх гэсэн хүлээлттэй  байна” гэсэн юм.