Өмнөговь аймгийн Ханбогд сумын нутаг дахь "Цагаан хад" суурьшлын бүсэд байрлах "Монфорд" ХХК-ийн байранд тусгаарлалтад байсан тээврийн жолооч нар нэгнийхээ аминд хүрсэн харамсалтай хэрэг өчигдөр гарсан.

   Тодруулбал, Сэлэнгэ аймгийн харьяат 44 настай эрэгтэй М-ийг Баянхонгор аймгийн харьяат 37 настай Б нь согтуурсан үедээ маргалдаж, зодолдсоны улмаас амийг нь хохироосон гэх мэдээлэл олон нийтийн сүлжээнд цацагдсан.

         Бид хэргийн газар юу болсон талаар эх сурвалжаас тодруулахад “Өчигдөр тус бөмбөлгийн хоёр жолооч тусгаарлалтын байрандаа архи ууж, хоорондоо маргалдаж, зодолдсон. Нас барсан жолооч эхлээд муудалцсан залуугийнхаа ташаан тус газар нь сэрээ зоож, танхайрсан байгаа юм. Гэтэл сэрээгээр биеэ зүсүүлсэн залуу ахыгаа дуудсан гэсэн. Ах нь ирээд дүүгээ өмөөрч, согтуу жолоочийг цохиж, чулуун шалан дээр унагасан юм билээ. Тэгээд газар дээрээ нас барсан гэж хүмүүс ярьж байсан" гэсэн юм. 

  Харин ЦЕГ-ийн хэвлэл мэдээллийн төвийн ахлах мэргэжилтэн Д.Оюунаас тодруулахад “Өчигдөр 16:00 цагийн үед "Цагаан хаданд нэг иргэн нас барлаа" гэх дуудлага бүртгэгдсэн. Дуудлагын дагуу хэргийг үргэлжлүүлэн шалгаж байгаа" гэв.