Өнөөдөр монгол бөхөнгийн өдөр тохиож байна. Монгол бөхөн сүүлийн жилүүдэд идэш тэжээлийн хомстол, их хүйтрэл, халдварт өвчний улмаас хорогдож 2020 оны нэгдүгээр сарын тооллогоор 5000 орчим тоо толгой үлдээд байсан юм. Тэгвэл Дэлхийн байгаль хамгаалах сангийн Монгол дахь хөтөлбөрийн газрын мэргэжилтнүүд, Говь-Алтай аймгийн Байгаль орчны газар, “Бөхөн хамгаалах сүлжээ” багийнхан хамтарч 2020 оны арваннэгдүгээр сард хийсэн тооллогоор монгол бөхөнгийн тоо толгой 3500 гаруйгаар өсч, хамгийн багадаа 8500 гаруй болжээ. Энэ нь  тусгаар жижиг сүргүүдийн тоо орсон  нэгдсэн дүн юм.

Энэ онд “Эко” клубын сурагчидтай хамтран булаг шандын эхийг хамгаалах автомат камер суурилуулан мэдээлэл цуглуулах, иргэдэд холбогдох хууль тогтоомжийг танилцуулах, малчдад малын бэлчээрийг хуваарьтай ашиглах зөвлөмж хүргэх гэх мэт цогц ажлууд тогтмол зохион байгуулагдахаас гадна Говь-Алтай аймгийн Чандмань сумын Улаан шалын хоолойд Монгол бөхөн сэргээн нутагшуулах ТЭЗҮнэлгээ судалгааны ажил хийхээр төлөвлөжээ.