Ойрын хавьтал болсон иргэн тусгаарлалтын байрнаасаа оргожээ. Тодруулбал, Ховд аймагт тусгаарлалтад байсан иргэн өчигдөр тусгаарлалтын байрнаасаа оргосон байна.

Энэ талаар Ховд аймгийн Засаг дарга Б.Дүгэржаваас тодруулахад “Манай аймагт коронавирусийн халдвараар 156 хүн өвчилсөн нь батлагдаад байна. Одоогийн байдлаар Ховд аймгийн төвд халдвар бүртгэгдээд байгаа. Мөн Мөст суманд сэжигтэй тохиолдол илэрсэн. Иргэд тусгаарлалтад байх хугацаандаа  тусгаарлалтын дүрэм зөрчиж байгаа асуудал бий. Тухайлбал, өчигдөр нэг иргэн хамгаалалт авсан байрны орцоор гарч, зугтсан хэрэг гарсан. Нууцаар гарсан даруйд нь алба хаагчид араас нь хөөж, барьж авсан юм билээ. Тухайн иргэн нь алба хаагчдад хэлэхдээ “Ойрхон эмийн сан орох гэж байсан” хэмээн худал мэдүүлсэн байна лээ. Энэ мэт бусдыгаа эрсдэлд оруулж байгаа хүмүүс бий. Мөн Мөст сумын харьяат иргэн .. –ийн эхнэр нь Ховд аймгийн Нэгдсэн эмнэлэгт амаржсан юм билээ. Эхнэрээ эмнэлгээс гаргасны дараа хулгайн замаар Мөст сум руугаа явсан байгаа юм. Тухайн иргэн нь өөрөө Ховд аймагт буяны ажилд оролцсон. Буяны ажилд оролцсон хүмүүсээс халдвар илэрч, томоохон голомт болоод байгаа. Хулгайн замаар явсан учраас бид энэ талаар мэдээгүй байсан. Аймагт хамт байсан хүмүүс нь Мөст сум руу зорчсон талаар мэдээлж байж мэдсэн. Иймд иргэдийг хариуцлагатай байхыг уриалж байна. Ингэж байж бид хүнд хэцүү цагийг давах болно” гэлээ.