Увс аймгийн Өмнөговь суманд чонын галзуу өвчин гарчээ. Тодруулбал, энэ сарын 17-ны шөнө тус сумын Улиаст багийн малчны хот руу галзуу чоно дайрч, бог мал барьжээ.

Энэ талаар Өмнөговь сумын Засаг дарга С.Өлзийгөөс тодруулахад “Сумын төвөөс 65 километрийн зайтай байрлах малчны хотонд чоно орж ирсэн тухай дуудлагыг хоёрдугаар сарын 18-нд хүлээж авсан. Засаг даргын орлогчоор ахлуулсан есөн хүний бүрэлдэхүүнтэй ажлын хэсэг томилогдож, малчны хотонд ажиллаад ирлээ. Чоноос дээж авч, Увс аймгийн Мал эмнэлгийн газарт шинжлүүлэхэд, галзуу өвчинтэй болох нь тогтоогдсон. Ариутгал, халдваргүйжүүлэлт хийж, галзуу чононд бариулсан таван бог малыг устгасан. Мөн 900 гаруй бог, 20 орчим бяруунд галзуу өвчний вакцин хийгээд байна. Засаг даргын тушаал гаргаж, галзуу өвчин гарсан хэсэгт долоо хоногийн хорио цээрийн дэглэм тогтоогоод байгаа. Малчид хүрз, модны тусламжтайгаар чоныг устгасан байсан” гэв.