Онцгой байдлын алба хаагчид зургаан хүний амь аварчээ. Тодруулбал, Сүхбаатар аймгийн Түмэнцогт сумын Баян-Овоо багийн Талын шанд гэдэг газарт суудлын автомашин цасанд суусан тухай дуудлага Онцгой байдлын газарт хоёрдугаар сарын 18-ны 03:30 цагт ирсэн байна.

Дуудлагын дагуу тус аймгийн Онцгой байдлын газрын Түмэнцогт сум дахь Эрэн хайх, аврах салбарын алба хаагчид зургаан км замыг туулан очжээ. Ингэхэд Сүхбаатар аймгийн Түмэнцогт сумаас Хэнтий аймгийн Баян-Овоо сумын чиглэлд зургаан зорчигчтой зорчиж явсан иргэн Г-ийн “Пропокс” загварын суудлын автомашин цасанд суусан байсныг татаж гаргасан гэдгийг Онцгой байдлын ерөнхий газраас мэдээллээ.