Сүхбаатар аймгийн Онцгой комиссын гуравдугаар хуралдаан өнөөдөр боллоо. Тус хурлаар спиртийн өндөр агууламжтай буюу 18-аас дээш градусын архи, согтууруулах ундааг худалдахыг хориглосон шийдвэрийг дахин 14 хоногоор сунгах шийдвэр гарчээ. Энэ талаар Сүхбаатар аймгийн ЗДТГ-ын даргаас тодруулахад “Коронавирусийн халдварын улмаас аймгийн хэмжээнд архи зарахыг хориглосон шийдвэр нэгдүгээр сарын 31 хүртэл гараад байсан. Харин өнөөдрийн хурлаар эл шийдвэрийг дахин 14 хоног сунгах шийдвэр гарлаа. Өөрөөр хэлбэл, хоёрдугаар сарын 15 хүртэл буюу Цагаан сарыг дуустал архи зарахгүй. Мөн архийг гар дээрээс болон шаглан худалдах, тусгай зөвшөөрөл бүхий дэлгүүрүүд хориглосон цагаар худалдан борлуулах явдал цөөнгүй гарч байгаа тул ийм шийдвэр гарсан. 2021 он гарсаар энэ төрлийн таван зөрчил аймгийн Цагдаагийн газарт бүртгэгдсэн” гэлээ.