Энэ сарын 27-ны лхагва гарагт Увс аймгийн Давст сумын Боршоо боомтоор Сангийн сайд Ч.Хүрэлбаатарын төрсөн ах, консул Ч.Ганболдын машинаар бараа оруулж, гаргаж байгаа бичлэг олон нийтийн сүлжээнд цацагдсан. ОХУ-тай хиллэдэг тус боомтыг ирэх дөрөвдүгээр сар хүртэл хаачихсан байгаа. Гэтэл хөл хорионы энэ үед Монгол Улсын дархан хилийг дураараа нээж, ОХУ-ын хил рүү нэвтэрч байхад Хилийн шалган нэвтрүүлэхийн ажилчид байхгүй байгаа нь мөн асуудал дагуулж байна. Үүнтэй холбогдуулан Увс аймгийн Засаг дарга  хууль сахиулах байгууллагын удирдлагуудтай өчигдөр шуурхай хуралдаан зарласан байна. Тус уулзалтад аймгийн Онцгой байдлын газар, Мэргэжлийн хяналтын газар, Гаалын газар, Хилийн цэрэг, Цагдаагийн газрын дарга нар оролцож, Тагнуулын даргаас утсаар мэдээлэл авчээ.

Увс аймгийн удирдлагуудаас тус бичлэгийг үнэн бодитой болохыг нь баталсан бөгөөд “Аймгийн Тагнуулын газар, Хилийн цэрэг 0245 дугаар ангийн удирдлагууд арванхоёрдугаар сарын эхээр онгоцоор ирсэн дипломат ачааг хүргэх зорилгоор зохион байгуулсан. Ингэхдээ бусад албаны байгууллагуудад мэдэгдээгүй, тодорхой заавар, зөвлөгөө аваагүй гүйцэтгэсэн нь тухайн тагнуулын ажилчид цар тахлын онцгой үеийн дэглэм зөрчсөн байна” гэж үзжээ.

Тиймээс “Цар тахлын үеийн өндөржүүлсэн бэлэн байдлын зэрэгт ажиллаж байгаа энэ цаг үед халдвар хамгааллын дэглэм зөрчигдсөн үйл ажиллагаа явагдсанд аймгийн Засаг дарга бөгөөд Онцгой комиссын даргын хувьд НИЙТ ИРГЭДЭЭСЭЭ УУЧЛАЛТ ХҮСЭЖ байна” гэжээ.

Тухайн бичлэг дээр гарснаар үүрэг гүйцэтгэсэн ажилчид хорио цээрийн дэглэм зөрчсөн гэдэг нь харагдаж байгаа тул Тагнуулын газрын хоёр ажилтанг яаралтай  тусгаарлалтад оруулж, түргэвчилсэн шинжилгээ авч ажиллахыг Эрүүл мэндийн газар болон холбогдох байгууллагуудад үүрэг болгосон байна.

Мөн гэр тусгаарлалтын 14 хоног өнгөрсний дараа шалган тогтоох ажиллагаа явуулахыг Цагдаагийн газарт,

Ирсэн ачаанд ариутгал халдваргүйжүүлэлтийн ажил хийхийг аймгийн Зооноз өвчин судлалын төвд,

Ил задгай хаясан хамгаалах хувцсыг баримтжуулан устгалд оруулах ажлыг МХГ-ын удирдлагуудад тус тус үүрэг болгожээ.