Хөвсгөл аймгийн ИТХ-ын дарга, гамшгийн эрсдэлийг бууруулах орон нутгийн зөвлөлийн дарга Г.Мөнгөнхуягаар ахлуулсан ажлын баг Ханх суманд ажиллалаа. Ажлын баг газар хөдлөлтийн голомт болох Хөвсгөл аймгийн  Ханх сумын Хороо багийн Хороо, Тураг багийн Ходон, Чичин, Хачим гэдэг газарт очиж, таван айл өрх,  ерөнхий боловсролын сургуулийн 320 хүүхдийн хичээлийн байр, 150 хүүхдийн дотуур байр, Засаг даргын Тамгын газрын байр, Цэцэрлэг, Соёлын төв, Гаалийн хорооны боомтын байр, гаалийн найман айлын орон сууц, сумын Цагдаагийн хэсэг, ХААН, Төрийн банк зэрэг байгууллагын 11 объектод орж, нөхцөл байдалтай танилцжээ. Энэ үеэр Ханх сумын 35 айл өрх, Засаг даргын Тамгын газар зэрэгт нийт 10.354.600 төгрөгийн хохирол учирсан болохыг тогтоосон байна.

Ханх сумын Хороо багийн  Ходон гэдэг газар 6.5 магнитуд хүчтэй газар хөдөлж, газрын өнгөн хөрсөнд цууралт үүссэн. Газар хөдлөлтийн ойролцоо өвөлжиж байсан хоёр  айлын өвөлжөөний хашааны дээвэр нурсан, нэг айлын хашааны доороос ус гарч, малын хэвтэргүй болсон, хоёр айлын модон байшин газар хөдлөлийн чичиргээнд хөдөлж, хана нь гажсан байна. Мөн Ханх сумын сургуулийн хичээлийн байр, дотуур байр, хүүхдийн цэцэрлэг, Засаг даргын Тамгын газрын барилгын дотор хөрөө тасалгааны хананд ан цав ихээр гарсан, каркасын дүүргэгч хана, багана, дам нурууны уулзварын хэсгээр ан цав гарсан аж.