Завхан аймгийн Дөрвөлжин сумын Тавантолгой багийн Ловон гэдэг газарт өвөлжиж буй иргэн Т төөрч, ор сураггүй алга болсон байсныг эсэн мэнд олжээ. Тодруулбал, нэгдүгээр сарын 15-ны 13:00 цагт иргэн Т гэрээсээ явган гараад сураггүй болсон тухай дуудлагыг нэгдүгээр сарын 16-ны  21:20 цагт Онцгой байдлын алба хаагчид хүлээн авсан байна. Улмаар Дөрвөлжин сумын цагдаагийн хэсгийн төлөөлөгчөөр ахлуулсан иргэд тус сумын харьяат иргэн 54 настай, эмэгтэй Т-г эрэн хайх ажиллагааг эхлүүлжээ. Иргэн Т нь хүүхэдтэйгээ муудалцсаны улмаас гэрээсээ гараад сураггүй болсон аж. Эрэн хайх ажиллагааг зохион байгуулж  тус өдрийн 23:40 цагт Буурал багийн Бор-Үзүүр гэдэг газар буюу гэрээс нь зүүн зүгт 40 километрийн зайтай байрлах иргэн Ү-ийн гэрээс эсэн мэнд олсон байна.