-БАРГИЙН ХҮН УНАЖ ЯВСАН МОРЬДОО ХҮНИЙ НҮДНЭЭС ДАЛД УЯЖ ОРХИОД МАРТАНА ГЭЖ БАЙХГҮЙ. ХЭРВЭЭ ЭЗЭН НЬ ОРХИСОН БОЛ ЗААВАЛ ИРЖ АВАХ БАЙСАН ГЭВ-

       Хэнтий аймгийн Баян-Адарга суманд модноос уясан хоёр адуу өлдөж, үхсэн байдалтай олдсон талаар бид өмнө нь мэдээлсэн билээ. Энэ хэргийн талаарх дараах сурвалжилгыг бэлтгэлээ.

Арванхоёрдугаар сарын 4-нд буюу өнгөрсөн баасан гарагт Баян-Адарга сумын IV багийн малчин Б малдаа явж байгаад модон дунд уяатай байгаа адууг олжээ. Тэрбээр олсон даруйдаа сумынхаа Байгаль орчны байцаагч руу мэдээ дуулгаж, албаныхан хэргийн газарт очсон гэнэ. Дуудлагын дагуу очиход хоёр адуу модноос цулбуураараа хүлээтэй, турж үхсэн байдалтай байжээ. Мөн хоёр адууны зэргэлдээх модонд уяатай ногт бас байж. Морьдын хажуугаар хүний мөр гэхээр юм байхгүй, сүлжилдсэн чонын мөр л байсан гэнэ. Мөн уяатай мориноос 200 метрийн зайтай модон дээр эмээл тохоотой байж.

Хулгайн адуу эсэхийг тогтоогоогүй

        Энэ талаар тус сумын Байгаль орчны байцаагчаас тодруулахад “Малчин дуудлага өгсөн даруй би болон багийн дарга, цагдаагийн алба хаагчтай хамт хэргийн газар очсон. Сумын төвөөс гурван километрийн зайд хоёр адуу уяатайгаа, турж үхсэн байдалтай байсан. Яагаад турж үхсэн гээд байгаа вэ гэхээр уяатай байсан модныхоо холтосыг юу ч үгүй мэрж, нэлээд хазалсан байна лээ. Үхсэнийх нь дараа чоно идсэн бололтой юу ч үгүй сэгчиж, зулгаасан байна лээ. Нэг адуу нь бүтнээрээ шахуу байсан бол нэг нь толгой, хөл нь л үлдсэн байсан. Бид Баруун давааг ар өвөргүй самнаж, мөр хайсан боловч цас орчихсон байсан учраас мөр олдоогүй. Одоогийн байдлаар хулгайлагдсан адуу эсэхийг ч сайн мэдэхгүй. Ямар ч гэсэн хөл хорио тогтоохоос өмнө адууг уяж орхисон байх. Учир нь, хөл хорио тогтоосноос хойш манай суманд цас орсон. Хэргийн газарт байсан эмээл дээр цас тогтсон байсан болохоор ингэж бодож байгаа. Мөн чононы мөрнөөс өөр мөр байхгүй байна лээ. Хулгайч хулгайлаад модноос хүлж орхисон бол хөл хорио тогтоосон учраас ирж авч чадаагүй байх. Адуу олдсон газрын хажуухан талд эргүүлийн пост гарсан байгаа” гэлээ. Мөн тэрбээр “Модноос уяатай ногт байсан болохоор “Нэг адуу мултарч, амь гарч” гэж бодож байгаа” гэсэн юм.

      Түүнчлэн адууг модноос уяж орхисон этгээд унаж явсан мориноосоо эмээлээ авч, модон дээр тохоод, хөтөлж явсан хоёр адуугаа модноос уяж, удалгүй эргэж ирж авна гэж тооцоолоод сумын төв рүү машинтай орсон байж магадгүй. Баргийн хүн унаж явсан морьдоо хүний нүднээс далд газар уяж орхиод мартана гэж байхгүй байх. Хэрвээ эзэн нь орхисон бол өнгөрсөн хугацаанд ирж авах байсан” гэлээ.  

Адууны эзнийг хайж байна

          Адууны эзэн олдоогүй байгаа гэнэ. Энэ талаар холбогдох албаны хүнээс тодруулахад “Тойргийн сумдын цахим хаягт зар байршуулж, адуугаа алдсан хүмүүст хэл дуулгасан. Баян-Адарга сумаас адуугаа алдсан хэд хэдэн малчин ирж үзсэн ч эзэн нь олдоогүй байна. Тойргийн сумдаас олон хүн холбогдож байгаа ч “Энэ манай адуу мөн” гэж баталсан хүн байхгүй. Зүс нь таарч байгаа ч биш байгаад байна” гэв.

Хэнтий аймагт малын хулгай ихэсчээ

        Түүнчлэн тус суманд сүүлийн хэдэн жил малын хулгай газар авч байгаа талаар малчид ярьж байна. Энэ талаар Баян-Адарга сумын малчин Г “Чоно, нохой ч элбэг, хулгайч ч ширүүн байна. Айл болгон л ганц, хоёр тооны адуу мал байсхийгээд л алддаг болсон. Тухайлбал, манайх л гэхэд өнгөрсөн намраас хойш манайх хоёр тооны адуу алдаад байна. Сая уяатай үхсэн адууны сураг гарахаар нь очиж үзлээ. Манай алдсан адууны хүрэн зүстэй таарч байгаа ч биш байна лээ. Айлууд ганц, хоёр тооны мал алдахаараа цагдаад тэр бүр ханддаггүй юм билээ. Манайх гэхэд л хоёр адуугаа цагдаад тэмдэглүүлээгүй. “Айлын адуунд нийлсэн юм болов уу” гэж хайж явсаар хоёр сар өнгөрлөө. Одоо ч хулгайч авсан нь тодорхой боллоо” хэмээлээ.