Завхан аймгийн Засаг дарга Д.Түвшинжаргал арванхоёрдугаар сарын 7-ны өдөр захирамж гаргаж, аймаг, сумдын төв доторх зорчих хөдөлгөөнийг 20:00-07:00 цагийн хооронд хязгаарлахаар болжээ. 

Улаанбаатар хотоос Завхан аймагт ирэхээр 5,000 орчим иргэн бүртгүүлснээс арванхоёрдугаар сарын 1-нээс хойш 1800 гаруй иргэн ирсэн байна. Эрсдэлтэй бүс нутгаас иргэд ийнхүү олноороо ирж буй тул Аймгийн Онцгой комиссын Шуурхай штаб хуралдан хэд хэдэн шийдвэр гаргажээ.  Тухайлбал, Улаанбаатар хот болон бусад голомт бүхий бүс нутгаас ирсэн иргэд, тэдний гэр бүлийн гишүүдэд гэрийн тусгаарлалтад байх үеийн журмыг мөрдүүлж, хяналт тавихад төрийн болон төрийн өмчит байгууллагын албан хаагчдыг татан оролцуулж, эргүүл жижүүрээр ажиллуулахыг холбогдох албан байгууллагын дарга, эрхлэгч, сумын Засаг дарга нарт даалгав. Мөн гэрийн тусгаарлалтад байх иргэдийн шаардлагыг хангуулж, хяналт тавих, зохион байгуулах ажлын хэсгийг байгуулж, хяналтыг хэрэгжүүлэх журам, ажлын төлөвлөгөө, зураглал, цагийн хуваарийг холбогдох хууль, тогтоомжийн дагуу боловсруулж, хэрэгжилтийг олон нийтэд тайлагнахыг тус тус үүрэг болгожээ.