Завхан аймгийн Баянтэс суманд урьд шөнө -50 хэм хүрч хүйтэрчээ. Үүнтэй холбоотойгоор бид Баянтэс сумын Засаг дарга  Х.Лүндээжанцантай холбогдож нөхцөл байдлыг тодрууллаа.

    Тэрбээр “Манай суманд 50 градус хүрч хүйтэрлээ. Малчид руу хүрэх зам харгуй хаагдаж, цасанд боогдоод нөхцөл байдал хүндхэн байна. Цасны хэмжээ 25-40 сантемитр байна.  Бид малчидтайгаа утсаар холбогдож, мэдээлэл авч байна. Одоогоор малынхаа араас яваад эндсэн, осгосон, төөрсөн хүн байхгүй байна. Сумын цаг уурын газраас малчдад хүйтний эрч чангарах анхааруулгыг өгч байсан болохоор харьцангуй бэлтгэлтэй байсан. Хамгийн хол айл нь сумын төвөөс 80 километрийн зайтай байгаа. Өвс тэжээлийн хүрэлцээний хувьд сумаас өгөх тэжээл дууссан. Одоо аймаг болон улсын нөөцөөс 50 хувийн хямд үнээр татан малчиддаа хүргэж байгаа. Гэхдээ өвс, тэжээлий хүрэлцээ тун муу байна. Хөнгөлөлттэй үнээр авч байгаа өвс нэг айлд таван шуудай л очиж байгаа. Энэ цаг агаарын чанга үед таван шуудай тэжээл хаанаа ч хүрэхгүй шүү дээ. Өнөөдөр бид Сум болон Аймгийн Онцгой комисстой ярилцаж байгаад малчид руу хүрэх зам харгуйг нээх арга хэмжээ авахаар ажиллаж байна” гэв.