Хөл хорио тогтоож, хүмүүс гэрээсээ гарахгүй байгаа энэ үед алт олборлож эхэлсэн байна

      Сэлэнгэ аймгийн Орхонтуул сумын III багийн нутаг "Хул азарганы тохой" хэмээх газарт “Эрин Эрдэнэс” ХХК-ийн 40 гаруй ажилчин хууль бусаар алт олборлож байжээ. Тус компани нь 2019 оны зургадугаар сарын 6-нд Сэлэнгэ аймгийн Засаг дарга Ш.Оргилоос “Хайрга, дайрга олборлох” тусгай зөвшөөрөл авсан байна. Өнгөрсөн наймдугаар сараас хойш тус компанийн ажилчид техник, хэрэгслээ Орхонтуул сумын нутагт байршуулж эхэлжээ. Тогтвортой үйл ажиллагаа явуулж харагдахгүй байсан учраас нутгийн иргэд эхэндээ тоогоогүй байна. 

      Гэтэл хөл хорио тогтоож, хүмүүс гэрээсээ гарахгүй байгаа энэ үед ажиллаж эхэлсэн байна. Арваннэгдүгээр сарын эхээр тус компанийнхан өдөр, шөнөгүй ажиллаж эхэлсэн нь иргэдийн анхаарлыг татжээ. Ингээд нутгийн иргэд газар дээр нь очиход “Хайрга, дайрга” олборлох нэрийн дор хууль бусаар алт олборлож байсан аж. Улмаар алт угаасан усаа Туул голд цутгаж байсныг илрүүлжээ.

Сумын удирдлагууд, байгаль орчны байцаагч, цагдаа, иргэдийн төлөөлөл удаа дараа шаардлага тавьсан ч хүлээж аваагүй байна. Компанийн ажилчидтай уулзаж, эрх бүхий албан тушаалтан болон холбогдох дарга нарын талаар асуусан ч “Мэдэхгүй” гэсэн үгээр хаацайлаад өнгөрчээ. Тиймээс Орхонтуул сумынхан “Сүүлийн хэдэн өдөр хөл хориог умартан, нутгаа аврах гэж тэмцсэний үр дүнд өнөөдрийн байдлаар ажлыг нь зогсоогоод байна”гэсэн юм. 

            Дайны хажуугаар дажин гэгчээр Сэлэнгэ аймагт халдварын шинэ голомт бүртгэгдэж, бүх хүн хөл хорионд ороод буй. Улмаар Орхонтуул сум нь Дархан хоттой ойрхон оршдог. Дархан хотод мөн коронавирусийн халдвар бүртгэгдэж, тэг зогсолт хийгээд байгаа юм. Тиймээс Орхонтуул суманд хөл хориог ягштал биелүүлэх шаардлагатай байгаа. Гэтэл хөл хорионд ороод суухаар өнөөх компанийн ажилчид шөнөөр ажлаа хийж, алт ухаад байгаа учраас сумын иргэд тайван сууж чадахгүй байгааг хэлж байна. Тиймээс хууль бусаар алт олборлож байгаа тус компанийг шалгах, арга хэмжээ авах эрх бүхий холбогдох газрынханд хандсан байна.