Улаанбаатар хотоос Ховд аймагт очсон ачаа тээврийн автобусанд нууцаар 10 хүн тээвэрлэж очсон зөрчил илэрсэн талаар бид мэдээлсэн билээ. Тодруулбал, энэ сарын 15-нд тус аймгийн Бичигтийн постоор нэвтэрсэн ачаа тээврийн автобусанд 10 хүн тээвэрлэж явсныг мэргэжлийн байгууллагынхан илрүүлсэн юм. Автобусанд нуугдаж очсон иргэдийг “Цагаан уул” амралтын газарт тусгаарлаж, коронавирусийн халдварын эсрэг шинжилгээ авсан юм. Тэгвэл тус автобусанд Ховд аймгийн удирдлагууд очсон талаар цахим орчинд мэдээлжээ. Тодруулбал, “Ховд аймгийн Засаг даргын орлогч Ч.Уранчимэг, ИТХ-ын дарга Г.Пүрэвганди, Монгол банкины улсын байцаагч н.Дүгэржав нар ирсэн байна. Тэд тусгаарлалт нэрийн дор гэртээ амарч байгаа” гэх утга бүхий мэдээлэл бичигдсэн байна. Энэ талаар Ховд аймгийн Засаг даргын орлогч Ч.Уранчимэгээс тодруулахад “Би автобусанд нуугдаж ирээгүй. Би Онцгой комиссын хуралд сууж байгаа. Би хөл хорио тогтоох үеэр Улаанбаатар хотод албан ажилтай явж байсан ч шаардлагатай шинжилгээ, албан бичгээ аваад аймагтаа гурван хоногийн өмнө ирсэн. Надтай цуг Манай аймгийн ИТХ-ын дарга, цагдаагийн дарга зэрэг чиг үүргийн хүмүүс ирсэн” гэлээ.