Улс даяар хөл хорио тогтоосон энэ үед Сэлэнгэ аймгийн Орхонтуул сумын Засаг даргаар ахлуулсан ажлын хэсэг малчдыг хөөж, нутгаасаа гаргахыг шаардаж, албан хүчээр бэлчээр чөлөөлөх ажил зохион байгуулсан талаарх мэдээлэл цахим орчимд цацагдаад байгаа. Энэ талаар Шадар сайд Я.Содбаатар “Хөл хорионы энэ үед малчдыг хөөж, албадан нүүлгэсэн бол хатуу хариуцлага тооцно” хэмээн мэдэгдлээ.
Тэгвэл бид энэ талаар Орхонтуул сумын Засаг дарга П.Батбаатартай холбогдож тодрууллаа. Тэрбээр “Малчид, иргэдээс ирсэн өргөдөл гомдлын дагуу арваннэгдүгээр сарын 11-12-ны өдрүүдэд өөр аймаг, сумаас отор нүүдлээр ирсэн  малчдаар явж бэлчээр нутаг чөлөөлүүлэх  албан мэдэгдэл өгч ажилласан. Одоогоор манай суманд Өвөрхангай,  Төв Булган гэх гурван аймгийн малчдын 10382 толгой мал ирсэн байгаа. Отроор ирсэн 40 гаруй айлын 16-гаар нь бид орж уулзсан. Энэ 16 айл нь нутгийн гүн рүү ороод, сумын төвийн айлуудтай хил залгаа айлын өвөлжөө дээр буусан учир нутгийн зах руу нүү гэж хэлсэн. Одоогийн байдлаар бид нэг ч айлыг нутгаасаа хөөж гаргаагүй.  Харин тэднийг “Та нар ядаж нутгийн гүнээс холдож, ядаж хил дагуу буу. Цас ороогүй учир усгүй байгаа. Бид худагтай газруудаар буухыг зөвшөөрч байна. Хөл хорио тогтоосон болохоор та бүхнийг нутгаасаа гаргахгүй” гээд зах руу буух үүрэг өгсөн. Мөн малчдыг нүүлгэж, ачаалж байгаа зураг нь нутгийн гүнээс зах руу нүүж байгаа айлын зураг. Бид малчдад тусласан төдий” гэлээ.