Коронавируст халдвар цар тахлаас урьдчилан сэргийлэх зорилгоор Улсын Онцгой комиссын шийдвэрээр 2020 оны 11 дүгээр сарын 12-ны өдрийн 06:00 цагаас 2020 оны 11 дүгээр сарын 17-ны өдрийн 06:00 цаг хүртэлх хугацаанд гамшгаас хамгаалах бүх нийтийн бэлэн байдлын зэрэгт шилжүүлсэн. Энэ хугацаанд арилжааны банк, хүнсний дэлгүүр, супермаркет, хүнсний зах, хүнс үйлдвэрлэл, шатахуун түгээгүүр, эмийн сан, эмнэлэг, худаг, усан хангамж, дулаан хангамж, хэвлэл мэдээлэл, харилцаа холбоо, буяны ажлаас бусад үйл ажиллагааг хязгаарлан төрийн байгууллагууд тусгай горимын дагуу ажиллаж эхлээд байна. Булган аймгийн Шуурхай штабын шийдвэрээр дээрх хугацаанд аймгаас гарах хөдөлгөөнийг 2020 оны 11 дүгээр сарын 12-ны өдрийн 16:00 цагаас хязгаарлахаар төлөвлөж байгаа бөгөөд төлөвлөсөн хугацаанаас өмнө аймгаас гарах иргэд ажлаа зохицуулах боломжтой тул замын хөдөлгөөний аюулгүй байдлыг хангаж, яарч сандралгүй замын хөдөлгөөнд оролцохыг анхааруулж байна. УОК, аймгийн Онцгой комисс, Шуурхай штабаас цагийн үеийн нөхцөл байдалтай уялдуулан гаргаж байгаа шийдвэрүүдийг дагаж мөрдөн шаардлагагүй тохиолдолд гэрээсээ гарахгүй байх, гарсан тохиолдолд маскаа зүүж, халдвар хамгааллын дэглэмийг мөрдөхийг зөвлөж байна.