Сэлэнгэ аймгийн Орхон сум байгуулагдсаны 60 жилийн ой тохиож байна. Тус сумын наадам өчигдөр болжээ. Цахим сүлжээнд тус сумын наадмын нээлтийн бичлэг цацагдаж, олон нийтийн шүүмжлэлд өртөөд байгаа. 

       Бид наадмын нээлтийн найруулгын талаар Орхон сумын Засаг дарга Г.Бат-Орхоноос тодрууллаа. Тэрбээр “Сумын 60 жилийн ойн баяр наадам өргөн дэлгэр сайхан болж байна. Сумын наадмын нээлтийг Соёлын төвөөс найруулж, зохион байгуулсан. Утга учиртай сайхан нээлт боллоо. Харин зарим хүн сум орон нутгийн онцлог, агуулгыг ойлгохгүй учраас шүүмжилж байх шиг байна. 1961 онд “Орхон хонь” гэж мах, ноосны чиглэлийн хонийг өргөмжилж, баталсан байдаг. Манай сумын төв хаалганы хажууд хонины хөшөө босгосон байгаа. Хониныхоо хөшөөний нээлт, сумын наадмын нээлтийг хамтад нь хийж, нутгийнхаа онцлогийг харуулж, хүүхэд багачуудтайгаа хамтарсан тоглолт зохион байгууллаа. Ойлгохгүй хүмүүс янз бүрээр бичиж байгаа юм шиг байна” гэлээ.