Өчигдөр орой Хөвсгөл, Эрдэнэт чиглэлд том хэмжээтэй мөндөр, дуу цахилгаантай аадар бороо орж, аянга буужээ. Байгалийн гамшигт үзэгдлийн улмаас Эрдэнэт хотод цахилгаан тасалджээ. Харин Хөвсгөл аймагт орсон мөндрийн улмаас иргэдийн эд хөрөнгө сүйдсэн байна.

Энэ талаар Хөвсгөл аймагт амьдардаг иргэнээс тодруулахад “Өчигдөр орсон мөндөр ундааны савны бөглөөнөөс том хэмжээтэй байсан. Өндөгнөөс үл ялиг жижиг байж магадгүй. Мөндөр цохиулсны улмаас айлуудын байшингийн дээвэр цоорч, машины цонх хагарсан. Ойрхон зуур байгалийн маш хүчтэй гамшигт үзэгдэл боллоо” гэв.

Аялал зугаалгын улирал эхэлж байгаа энэ үед иргэд та бүхнийг гол усны аюулаас сэрэмжтэй байхыг анхааруулж байна.