Завхан аймгийн Баянтэс сумын Бужир багийн нутаг Бужирын дөрөлж гэх газар баавгай адуу идсэн тухай дуудлага 2021 оны есдүгээр сарын 22-ны өдөр тус аймгийн Онцгой байдлын газар иржээ.

Мөн энэ сарын 25-ны өдөр Тосонцэнгэл сумын Оргих багийн малчин Улаан нүүр гэх газар баавгай харсан, энэ сарын 27-ны өдөр Сонгино сумын Баян-Айраг багийн Хүйтэн сээр гэх газар баавгайн хоёр бамбарууш орж ирсэн зэрэг мэдээлэл аймгийн Онцгой байдлын газарт иржээ.

Иймд малчин, ард иргэд:

• Малд явахдаа анхаарал болгоомжтой байж, өндөр настан, хөгжлийн бэрхшээлтэй иргэн, бага насны хүүхдийг малд явуулахгүй байх
• Жимс, самарт явахгүй байх, хээр хөдөө, ойн сав бүхий газар хонохгүй байх
• Баавгай тааралдвал айлгаж цочоохгүй байж амь насаа хамгаалахыг Завхан аймгийн Онцгой байдлын газраас онцгойлон анхааруулж байна. 

Ташрамд дурдахад, баавгай нь махаар хоолшдоггүй, заавал самар, жимс, ургамлын гаралтай хоол тэжээлийг хольж иддэг.  Самар,  жимс ховор ургасан үед өлссөн баавгай улаан шоргоолжны үүр ухаж эхэлдэг байна.

Улаан шоргоолжинд алдегид хэмээх спирт байдаг бөгөөд түүнд согтсон баавгайг “Хорхойтсон баавгай” гэдэг аж. Ийнхүү согтсон баавгай хаашаа ч хамаагүй тэнэж хүн, амьтанд халдах тохиолдол гарч байжээ.