Төв аймгийн Мөнгөнморьт сумын Жаргалант багийн Зүүн бүрх гэх газар самар түүхээн Мөнгөнморьт сумын чиглэлд зорчиж явсан нийслэлийн Багануур дүүргийн харьяат гурван иргэн автомашинтайгаа Зүүн бүрх голд осолджээ. Тодруулбал, энэ талаарх дуудлага мэдээллийг ОБЕГ өчигдөр буюу есдүгээр сарын 28-ны 20:13 цагт хүлээн авч, Төв аймгийн Онцгой байдлын газрын Мөнгөнморьт сум дахь Гал түймэр унтраах, аврах 75 дугаар анги, Цагдаагийн хэсгийн алба хаагчид ослын газарт очсон байна.

Ослын газарт очиход "Газ 2410" загварын суудлын автомашин Зүүн бүрх гол руу унаж, жолооч 37 настай эрэгтэй З автомашинаасаа гарч, голын эрэг дээр гарсан бол, зорчигч 52 настай эрэгтэй Э, 44 настай эрэгтэй Б нар живж, амиа алджээ. Амиа алдсан хоёр иргэний цогцсыг тухайн өдрийн 21:13 цагт голоос гаргаж, Мөнгөнморьт сум дахь Цагдаагийн хэсэгт шилжүүлэн өгчээ. Осол гарах үед автомашины жолооч, зорчигчид согтууруулах ундаа хэрэглэсэн байсныг тогтоосон байна.

М.ЖАВХЛАН