Баянхонгор аймгийн Баянхонгор сумын ерөнхий боловсролын лаборатори “Номундалай” цогцолбор сургуулийн хичээлийн шинэ байрны нээлт боллоо. Нээлтийн ёслолд Монгол Улсын Их Хурлын дарга Г.Занданшатар, Барилга, хот байгуулалтын сайд Б.Мөнхбаатар, Боловсрол, шинжлэх ухааны дэд сайд Г.Ганбаяр нар оролцсон аж.

96 жилийн түүхтэй тус сургуулийн барилга 1965 онд ашиглалтад орж байжээ. Цаашид ашиглах боломжгүй гэсэн мэргэжлийн байгууллагын дүгнэлт 2005 оноос хойш удаа дараа гарсан байна. Үүний дагуу Боловсрол, шинжлэх ухааны яамны захиалгаар Ц.Энхбат захиралтай “Хаш гоёо” ХХК шинэ сургуулийг нэг жилийн дотор улсын төсвийн 8,7 тэрбум төгрөгийн хөрөнгө оруулалтаар бүтээжээ. Ийнхүү тус сургуулийн 2850 гаруй сурагч, 173 багш, ажилчид тохилог сургуультай болсон байна.