Барилга, хот байгуулалтын сайд Б.Мөнхбаатараар ахлуулсан Ажлын хэсэг Хэнтий аймагт ажиллаж байна.

       Ажлын хэсэг улсын төсвийн хөрөнгө оруулалтаар хэрэгжиж байгаа төсөл хөтөлбөрүүдтэй танилцлаа. Хэнтий аймгийн үерийн хамгаалалтын байгууламж барих төслийн нэгдүгээр ээлжийн ажил есдүгээр сарын 1-нд дуусаж, гуравны өдөр Улсын комисс ажилласан байна. Тус байгууламж нь 1009 метр урттай 10 ам метр/секунд усыг зайлуулах хүчин чадалтай. Бетон суурьтай, сувгийн ханийг бетон цутгамал хавтангаар тоноглож хийгджээ. Авто машины хоёр гүүр, явган хүний гурван гүүрэн гарцыг тус тус хийж гүйцэтгэсэн байна. Хэнтий аймаг, Хэрлэн сумын үерийн хамгаалалтын байгууламжийн хоёрдугаар ээлжийн ажил гэрээ нь хийгдэж, төлөвлөлтийн шатанд байна.

       Хоёрдугаар ээлжийн ажил 10 ам метр/секунд усыг зайлуулах хүчин чадалтай байх бөгөөд бетон суурьтай, сувгийн ханийг бетон цутгамал хавтангаар тоноглож суурьлуулахаар төлөвлөсөн 6037 метр үерийн усны далан, аймгийн төвийн ус зайлуулах байгууламж 8685 метр урттай байх юм байна. Хэнтий аймагт Барилга, хот байгуулалтын сайд Б.Мөнхбаатар, БХБЯ-ны Нийтийн аж ахуйн бодлогын хэрэгжилтийг зохицуулах газрын дарга Г.Цогтсайхан, Орон сууц, санхүүжилтийн хэлтсийн дарга Э.Батболд , БХТ-ийн Барилга, байгууламж захиалагчийн хяналтын хэлтсийн дарга Э.Мөнхсүх болон бусад холбогдох албаныхан ажиллаж байна.