Баянхонгор аймгийн Эрдэнэцогт сумын Эрхт тамч багийн Эрхэтийн-Ар тогоот гэх газар наймдугаар сарын 20-ны 10:00 цаг орчимд сэтгэцийн өөрчлөлттэй 45 настай эмэгтэй жимсэнд явган яваад сураггүй болсон. Үүнтэй холбоотойгоор Баянхонгор аймгийн Онцгой байдлын газрын алба хаагчид, Эрдэнэцогт сумын Засаг даргын Тамгын газрын ажилтнууд, сураггүй болсон иргэний ар гэр өчигдөр буюу наймдугаар сарын 22-ны өдөр Эрхт тамчийн хавцлын хоёр километр газарт хоёр удаа самналт хийжээ.

          Самналт хийж, эрэн хайх ажиллагаа зохион байгуулсан ч сэтгэцийн өөрчлөлттэй эмэгтэйг олоогүй байна. Эрхт тамч гэх газарт тухайн өдөр манан бууж, цас орсонтой холбоотойгоор өчигдрийн 17:30 цагт эрэн хайх ажиллагааг зогсоожээ. Харин өнөөдөр буюу наймдугаар сарын 23-нд цаг агаарын байдлаас шалтгаалж, эрэн хайх ажиллагааг дахин эхлүүлэх юм.