Дорнод аймгийн хойд бүсийн таван суманд цахилгаан хязгаарлаад хэд хонож байгаа аж. Тодруулбал, БНХАУ-ын 100 хувийн хөрөнгө оруулалттай, уул уурхайн “Шинь шинь” ХХК руу чиглэсэн агаарын шугамыг засварлах ажил явагдаж байгаа тул цахилгаан хязгаарласан байна.

              Энэ талаар Дорнод аймгийн Дашбалбар сумын Засаг дарга Ж.Ёндонжамцаас тодрууллаа. Тэрбээр “Дашбалбар, Баяндун, Баян-Уул, Чулуунхороот, Гурванзагал сумын Засаг дарга нарт Дорнод эрчим хүч ХХК-ийн инженерээс албан бичиг ирсэн. “Шинь шинь” ХХК руу чиглэсэн агаарын шугамыг засварлах ажил явагдаж байгаа тул цахилгаан хязгаарлаад байна. БНХАУ-ын хөрөнгө оруулалттай “Шинь шинь” ХХК нь манай сумын нутаг дэвсгэрт үйл ажиллагаагаа явуулдаг. Сумын төвөөс 70, аймгийн төвөөс 120 километрийн зайтай байрладаг. Энэ зун нийтдээ 15 хоног цахилгаан хязгаарлаад байна. Өмнө нь зургаа хоног цахилгаан хязгаарлаж, засварын ажил хийсэн бол наймдугаар сарын 17-ноос дахин хязгаарлаж байна. Бид энэ талаар лавлаж асуухад “Засварын ажил дутуу байсан” гэх тайлбарыг өгч байна лээ. Намрын ажил өрнөж байгаа энэ үед цахилгаан таслах нь маш хэцүү байна. Уг нь орой 20:00 цагт цахилгаан ирэх ёстой цагтаа ирэхгүй байгаа. Аж ахуйн нэгжүүдийн хөрөгчинд байгаа бараа, бүтээгдэхүүн гэсэх, айл, өрхийн мах муудах асуудал үүсэж байна. Гэхдээ өвлийн бэлтгэл ажил хийж байгааг буруутгах арга алга” гэв.