Хэнтий аймгийн Биндэр суманд өчигдөр атгасан гарны хэмжээтэй том мөндөр орж, иргэдэд багагүй хэмжээний хохирол учирчээ.

Энэ талаар бид  нутгийн иргэнтэй холбогдож тодруулахад "Манай суманд аадар бороо орсон. Харин том хэмжээний мөндөр орсон газар нь сумын төвөөс 20 орчим километрийн цаана Дарьт гэдэг газар юм билээ. Манай дүү яг мөндөр орсон газар байсан гэсэн. 10 орчим минут том хэмжээний мөндөр орж, автомашины цонх хагарсан гэсэн. Бас майхан нь урагдсан гэсэн. Мөндөр орсон газарт айл байдаг эсэхийг би сайн мэдэхгүй байна. Сумын удирдлагууд хөдөө явсан" гэлээ. 

Ойрын өдрүүдэд ихэнх нутгаар цаг агаар сэрүүсч, аадар бороо орох тул малчид иргэдийг голын ойролцоо байрлахгүй байх, малаа хол бэлчээхгүй байхыг анхааруулж байгаа. Тиймээс иргэд та бүхэн цаг агаарын болзошгүй эрсдэлээс сэргийлж бага насны хүүхдэдээ мөн анхаарал сайн тавихыг зөвлөж байна.