Ус цаг уур, орчны шинжилгээний газраас өчигдөр Өмнөговь, Баянхонгор аймгийн нутгаар их хэмжээний усархаг бороо орох тул малчид иргэдийг үер, усны аюулаас сэрэмжтэй байхыг анхааруулсан. Тэгвэл өнөөдөр Өмнөговь аймгийн Номгон, Манлай сумаас бусад нутгаар их хэмжээний усархаг бороо орж, айл гэр, нийтийн эзэмшлийн зам талбай, авто зам усанд автаад байна. Энэ талаар Өмнөговь аймгийн Шуурхай удирдлага, зарлан мэдээлэх төвийн дүн бүртгэл хариуцсан ахлах мэргэжилтэн, ахмад Э.Ууганбаяраас тодрууллаа.

-Өмнөговь аймгийн Даланзадгад суманд хэзээнээс эхлэн бороо орж, үер буусан бэ. Одоо үргэлжлэн орж байгаа юу?

    -Өнөөдрийн 04:20 цагаас их хэмжээний усархаг бороо орж эхэлсэн. Одоо ч орж байна. Маргааш 08:00 цаг хүртэл усархаг бороо орно гэж аймгийн Ус цаг уурын байгууллагаас мэдээлсэн.

-Онцгой байдлын газарт үер, усны аюултай холбоотой хэдэн дуудлага ирсэн бэ?

  -Онцгой байдлын газарт их хэмжээний усархаг борооны улмаас 110 дуудлага ирээд байна. Мөн аврах ажиллагааны таван дуудлага ирсэн. Дуудлагын 80 орчим хувь нь гэр, хашаа руу ус орсон тухай дуудлага байна. Үерийн улмаас цахилгааны утсанд доголдол үүссэн тухай хоёр дуудлага Онцгой байдлын газарт ирснийг Баруун цахилгаан түгээх төв рүү мэдэгдсэн.

Тог цахилгаантай холбоотой дуудлага их байна

    Ийнхүү Өмнөговь аймагт их хэмжээний үер буусны улмаас ес, 42, 43, 44, 52, 31, 32 дугаар орон сууц, гарааш, подвалд ус орсон тул цахилгаан хүчдэл салгажээ. Мөн малчин фидер гэх газар 06:17 цагт аянга бууж цахилгааны гэмтэл үүсгэсэн учир засварлаж байгаа аж. Түүнчлэн Ханбогд, Ханхонгор, Номгон суманд  цахилгаан тасарсан байна. Түүнчлэн, Даланзадгад сумын хэмжээнд цахилгаантай холбоотой айл өрхөөс ирж буй дуудлага нэмэгджээ. Иймд ӨБЦТС компаниас дөрван автомашин, 20 орчим ажилтан дуудлагаар ажиллаж байгаа аж.

Даланзадгад-Баяндалай чиглэлийн автозамыг хаажээ     

  Хүчтэй аадар борооны улмаас автозам, замын байгууламжууд үерт автаж байгаа тул иргэдийн эрүүл мэнд, эд хөрөнгийг болзошгүй эрсдэлээс урьдчилан сэргийлэх зорилгоор Даланзадгад-Баяндалай чиглэлийн автозамыг 2021 оны долдугаар сарын 24- ний 12:00 цагаас эхлэн тодорхойгүй хугацаагаар түр хааж, автотээврийн хэрэгслийн хөдөлгөөнийг зогсоожээ.

    Мөн үерийн улмаас орон гэртээ орох боломжгүй болсон иргэдийг НХҮГ-ын сувиллын байр болон Политехникийн коллежийн байранд өрөө бэлтгэж, түр байрлуулах байраар хангах чиглэлийг Шуурхай штабаас холбогдох хэлтэс, газрын дарга нарт өгсөн аж.

Б.БАДАМЗУЛ