Өмнөговь аймагт өчигдөр буюу долдугаар сарын 18-ны өдөр их хэмжээний бороо орж, үерлэжээ.

          Өмнөговь аймгийн Даланзадгад сумын хоёрдугаар багийн Хан-Уулын 12 дугаар гудамж, Өмнөд бүсийн цахилгаан түгээх сүлжээ ТӨХК-ийн дэд станц усанд автсан тухай дуудлагыг долдугаар сарын 18-ны өдрийн 15:07 цагт ОБЕГ хүлээн авсан. Тус аймгийн Онцгой байдлын газрын Гал түймэр унтраах, аврах 21 дүгээр ангийн алба хаагчид, сумын Засаг даргын Тамгын газрын ажилтнууд таван километр замыг туулан 15:45 цагт очиж, Өмнөд бүсийн цахилгаан түгээх сүлжээ дэд станцын 30 тонн усыг мотопомпоор соруулсан байна.

          Өмнөговь аймгийн Даланзадгад сумын Цагаанбулаг багийн Малчин хороолол /сумын төвөөс хойд зүгт 10 километрт/ долдугаар сарын 18-ны өдрийн 12:00-19:50 цагийн хооронд 22 миллиметр усархаг аадар бороо орсны улмаас иргэн Б-ийн жолоодож явсан автомашин уруйн үерт урсчээ. Тус аймгийн Онцгой байдлын газрын Гал түймэр, унтраах 21 дүгээр ангийн алба хаагчид 10 километр замыг туулан 18:30 цагт очиход уруйн үерт иргэн Б-ийн “Поробокс” загварын суудлын автомашин болон хоёр том хүн, гурван хүүхдийн хамт аюулгүй газарт татан гаргасан.

          Өмнөговь аймгийн Даланзадгад сумын Баянбулаг, Гурвансайхан, Баруунсайхан, Хан-Уул, Цагаанбулаг багуудад долдугаар сарын 18-ны өдрийн 12:00-19:50 цагийн хооронд усархаг аадар бороо орсны улмаас 19 гэр, байшин, хашаа уруйн үерт автсан тухай дуудлагыг долдугаар сарын 18-ны өдрийн 18:25 цагт ОБЕГ хүлээн авчээ. Тус аймгийн Онцгой байдлын газрын алба хаагчид, сумын Засаг даргын Тамгын газрын ажилтнууд, сумын Ерөнхий зориулалтын мэргэжлийн ангийнхан, мөн өдрийн 16:00 цагаас долдугаар сарын 19-ний өдрийн 03:00 хооронд 10 тонн уруйн үерийн усыг мотопомпоор соруулж, ус зайлуулах хоёр метр шуудуу татаж, дөрвөн метр автозамыг сэтэлж, үерийн усыг урсгах ажлыг хийсэн байна.

          Өмнөговь аймгийн Даланзадгад сумын Цагаанбулаг багийн Малчин хороолол гэх газарт өчигдрийн 12:00-19:50 цагийн хооронд 22 мм усархаг аадар бороо орсны улмаас иргэн Н-ийн жолоодож явсан автомашин уруйн үерт урсжээ. Тус аймгийн Онцгой байдлын газрын Гал түймэр, унтраах 21 дүгээр ангийн алба хаагчид 20 километр замыг туулан 21:10 цагт очиход уруйн үерт иргэн Н-ийн “Ланд круйзер-80” загварын суудлын автомашин болон хоёр том хүн, хоёр хүүхдийн хамт аюулгүй газарт татан гаргасан.

          Өмнөговь аймгийн Даланзадгад сумын Оюут багийн Оюутын наймдугаар гудамжны баруун талд автомашин цэвэр бохир ус дамжуулах далан цөмөрсний улмаас уруйн үерт суусан тухай дуудлагыг долдугаар сарын 18-ны өдрийн 20:50 цагт ОБЕГ хүлээн авсан. Тус аймгийн Онцгой байдлын газрын Гал түймэр унтраах аврах 21 дүгээр ангийн алба хаагчид хоёр километр замыг туулан 20:55 цагт очиж, иргэн Н-ын “Виш” загварын суудлын автомашиныг татаж гаргасан байна.