Өвөрхангай аймгийн Онцгой комисс өчигдөр хуралдаж, аймаг, сумын хэмжээнд баяр наадмыг тэмдэглэхгүй байх шийдвэр гаргажээ. Улмаар баяр наадамд төсөвлөсөн зардлаа эрүүл мэндийн салбарын ажилчдыг урамшуулах, урам зоригийг нь нэмэх, эрүүл мэндийн салбарт нэн шаардлагатай тоног төхөөрөмж, дутагдалтай байгаа эм, эмнэлгийн хэрэгсэл авахад зарцуулахаар шийдвэрлэсэн байна.

Энэ талаар  Өвөрхангай аймгийн Засаг дарга бөгөөд Онцгой комиссын дарга А.Ишдоржоос тодрууллаа.

         -Баяр наадам зохион байгуулахгүй байх шийдвэр гаргасан анхны аймаг танайх болж байна. Хүнд цагт ийм шийдвэр гаргасанд тань олон нийт нэлээд талархаж байх шиг байна. Одоогийн байдлаар танай аймагт нөхцөл байдал ямар байна вэ?

        -Өнгөрсөн тавдугаар сарын 22-ноос улсын хэмжээнд хөл хорионы дэглэмийг сулруулсан. Өөрөөр хэлбэл, "Вакцины бүрэн тунд хамрагдаад 14 хоносон хүн чөлөөтэй зорчиж болно" гэдэг шийдвэр гарсан. Үүнтэй холбоотойгоор хөдөө, орон нутагт ирэх иргэдийн хөл хөдөлгөөн эрс ихэслээ. Улмаар зөвхөн Өвөрхангай аймаг гэлтгүй бүх л аймагт коронавирусийн тохиолдол болон ойрын хавьтал нэмэгдсэн. Орон нутагт өдөрт 30-40 хүн буюу дээд талдаа 80 хүн шинээр бүртгэгдэх жишээтэй. Ерөнхий байдлаар нь авч үзвэл хоногт бүртгэгдэж байсан тохиолдол буурч, тогтворжиж эхэлж байна. Манай аймгийн хувьд өнгөрсөн гуравдугаар сараас хойш 81 голомт үүссэн. Манай аймагт үүссэн 81 кластерийн 17 нь бүрэн идэвхгүй болсон, дөрвийнх нь идэвх суларсан бол 60 кластер идэвхтэй хэвээр байгаа.

       -Наадам зохион байгуулахгүй гэсэн шийдвэрийг яагаад гаргахаар болсон бэ?

        -Халдварын голомт тогтворжиж байгаа дээр нь богинохон хугацаанд коронавирусийн тархалтыг бүрэн хумих ёстой. УОК-ын 171 дүгээр тогтоолоор “Ковидын нөхцөл байдалд дүгнэлт хийж, хөдөө орон нутагт долдугаар сарын 20-ноос хойш баяр наадмыг зохион байгуулах эсэх асуудлыг шийдвэрлэнэ” гэсэн. Тодорхой шийдвэр гараагүй байгаа энэ хугацаанд уяачид маань наадам болох эсэхийг хамгийн ихээр лавлаж байна. Тодруулбал, “Долдугаар сарын 20-д гараад хийвэл ч бид морь уяхгүй дээ”, “Хэзээ наадам зохион байгуулахаа хэлэхгүй бол морьдын уяа сойлго таарахгүй үе байна” зэрэг санал, гомдлыг удаа дараа хэлж байна. Иймээс уяач, иргэд, төрийн байгууллагын хооронд үүсээд байгаа эргэлзээтэй асуултад нэг мөсөн хариу өгөх шаардлага гарч ирсэн. Тэгээд Аймгийн онцгой комисс хуралдсан. Үнэхээр үр дүнтэй ажиллаж, ирэх сарын 20 хүртэл тархалтын тоог багасгаж болно. Гэвч наадам зохион байгуулснаас болж коронавирус дэгдвэл ирэх наймдугаар сард болох ЭЕШ хойшилно, хичээл сургууль эхлэх боломжгүй болно. Хүүхэд, багачууд, сурагчид маань хоёр жил хичээллээгүй учир хоцрогдолд орчихлоо. Иймээс халдварыг хумьж, эн тэргүүд хичээл сургуулийн үйл ажиллагааг цагт нь хэвийн эхлүүлэх ёстой гэж үзсэн.

           -Иргэд ямар хандлагатай байна вэ. Та бүхний шийдвэрийг хэрхэн хүлээж авч байна вэ?

          -Ковидын халдвар дахин тархвал ямар үр дүн гарах вэ гэдгийг тооцоолсон. Үүнээс харахад сөрөг үр дагавар олон гарч ирж байна. Жишээ нь, улаан бүсэд ажиллаж байгаа эмч, цагдаа, онцгойгийн албан хаагчдын ачаалал их, унтаж амарч чадахгүй байна. Мөн нөгөө талдаа эдийн засгийн хүнд байдалд орохоос эхлээд амиа алдах аюултай. Уяачид морио тэжээх, бөхчүүд бэлтгэл хийх зэргээр харилцан адилгүй зардал гарсан байж болно. Гэхдээ эрүүл мэнд, амь наснаас илүү зардал гэж байхгүй. Энэ бүхнийг тооцоолж байж баяр наадам тэмдэглэхгүй байх шийдвэр гаргасан. Баяр наадмын тухай хууль гэж бий. Тэмдэглэлт ойг зохион байгуулах нь бүх нийтээр болон нийтээр тэмдэглэх өдрүүдийн тухай хуулиар зохицуулагддаг. Тэгэхээр Өвөрхангай аймгийн 90 жилийн ой бүтэн жилийн хугацаанд зохион байгуулагдана. Морь уралдуулж, бөх барилдуулахгүй ч цахимаар хэрэгжүүлж болох эрдэм шинжилгээний хурал болон бусад үйл ажиллагааг зохион байгуулна.