Гэртээ байх хугацаандаа үр хүүхдээ асарч, гэр бүлийнхнээ халамжлахаас гадна ихийг хийж амжуулдаг ажилсаг, авьяастай ээж олон байдаг. Тэдний төлөөлөл бол Г.Хоролсүрэн юм. Тэрбээр хөл хорио тогтоосон өдрүүдэд шавар урлалаар хүүхэлдэйн киноны баатруудыг дүрсэлж, шатар хийсэн нь хүүхэд, багачууд төдийгүй эцэг, эхчүүдийн  сонирхлыг ихэд татаж байгаа аж. Баримлын шавраар хэрхэн хүүхэлдэйн киноны баатруудыг дүрсэлж, бүр  шатрын дүр болгож байгаа талаар нь Г.Хоролсүрэнтэй ярилцлаа.

-Сайн байна уу. Хатуу хөл хорионы энэ үед өдрийг хэрхэн өнгөрүүлж байна вэ?

-Намайг Г.Хоролсүрэн гэдэг. Ам бүл тавуулаа амьдардаг. Бүх нийтийн бэлэн байдлын хатуу хөл хорионы үеэр гэр бүлийнхэнтэйгээ цагийг үр бүтээлтэй өнгөрүүлэхийг хичээж байгаа.  

-“Гар урлал бие биедээ зааж өгье” цахим группд та шавраар хийсэн шатраа оруулсан байсан. Бүтээл хийх санаа хэрхэн төрсөн бэ?

-Полимер буюу халуун температурт хатдаг шавраар бүтээл хийж үзэхийг хүсдэг байсан. Хүүхдүүддээ зориулж 3D баримлын шавраар хийж өгсөн зүйлүүд эдэлгээ даадаггүй, толгох явцад амархан хугарч, гэмтдэг болохоор эдэлгээ даахуйц, аятайхан байдаг шавар судалж, хайсан. Полимер шавраар бүтээл хийхэд урамтай байсан тул гацуур модны чимэглэл хийж эхэлсэн. Эхэндээ туршлага муутай байсан болохоор олон удаагийн оролдлогын үр дүнд овоо ур дүйтэй болж ирсэн. Гацуур модны чимэглэл хийгээд үлдэгдэл материалаараа хүүдээ тоглох дуртай тоглоомынх нь загвараар шатар хийж өгсөн. Түүнийгээ фэйсбүүк групптээ оруултал олон хүнд таалагдсан байсан. Айл гэрт хэрэгцээгүй шатрын өрөг, суурь элбэг байдаг. Тиймээс хүүхдүүдэд сонирхолтой, тэд нандигнан хадгалах байдлаар шатар хийвэл зүгээр санагдсан.

-Таны гараас бүтээл хэр хурдан гардаг вэ. Шатрыг хэдий хугацаанд хийж байна?

-Нэг шатар хийхэд дунджаар найман цаг зарцуулдаг. Жаахан хүүхэдтэй болохоор төдийлөн цаг гаргаж чадахгүй байна. Нэг шатрыг гурав хоногт бэлэн болгодог.

-Хамгийн анхны шатрын захиалгыг ямар хүн хийж байв?

-Найз нөхөд, ах эгч, танилууд маань "Ийм загвартайг хийгээд өгөөч" гээд ирвэл үгүй гэж чаддаггүй. Өөрийнхөө хэмжээнд сайн хийж өгөхийг хичээдэг. Анхны шатар маань “Плантс зомби” байсан. Анхны захиалагч маань гадаадад амьдардаг, танил маань байсан. Гадаадын цахим группуудэд “Гоё шатар хийж өгсөнд баярлалаа. Илүү их хичээгээрэй” гэсэн пост оруусан байсан. Удалгүй охидтой айлууд “Frozen”-ны дүрүүдээр шатар хийлгэх санал тавьж эхэлсэн. Тэр нь ч надад их таалагдсан.

Шатрын өргийг хийхдээ нэгдүгээрт, шавраа бэлдэнэ их хатуу учир зөөлөн болтол нь нухаж базна. Хоёрдугаарт, өрөг найман хүү, хоёр тэрэг, хоёр морь, хоёр тэмээ, нэг хаан, нэг бэрс байдаг

-Хамгийн сүүлд ямар хүүхэлдэйн киноны дүрүүдээр  шатар хийсэн бэ?

-Хамгийн сүүлд уржигдар орой захиалгынхаа бүтээлийг бэлэн болгосон. Орчин үед хүүхдүүд “Youtube” болон телевизээр цуврал хүүхэлдэйн кино их үздэг болсон. “Gunball titans”-ийн дүрүүдтэй шатар хийж өгсөн. Захиалагч нартайгаа ярилцаж байгаад сонирхлынх нь дагуу хийж өгөхийг боддог. Хийж буй үйл явцынхаа зургаа хувь чатаар явуулж санал, сэтгэгдлийг нь сонсдог. Зарим эцэг эх, залуус дүү нартаа төрсөн өдрийн бэлэг болгож, дуртай киноных нь баатруудаар шатар хийлгэх захиалга өгч байгаа.

-Шатар хийдэг арга барил, хийх үйл явцын талаар танилцуулбал?

-Одоохондоо сонирхогчийн түвшинд хийж байгаа. Хийх ёстой дүртэйгээ аль болох адилхан л болгож хийхийг хичээдэг. Тухайн дүрийн онцлог шинж чанарыг илүү харуулахыг хичээж байна. Шатрын өргийг хийхдээ нэгдүгээрт, шавраа бэлдэнэ их хатуу учир зөөлөн болтол нь нухаж базна. Хоёрдугаарт, өрөг найман хүү, хоёр тэрэг, хоёр морь, хоёр тэмээ, нэг хаан, нэг бэрс байдаг. Хүүг хийхдээ ихэвчлэн нэгэн ижил юм уу харалдаа байгаа өргийн онцлог, хэрэглэгддэг зүйлийг харуулахыг зорьдог. Маш нарийн чамбай хийхийг шаарддаг чимхлүүр ажил ихтэй. Доод сууриа наалдуулахгүй байхын тулд калкин цаасан дээр хийж бэлддэг. Бүх зүйлээ бэлдэж, хийж дуусаад шарах шүүгээнд 130 хэмд 20-30 минут хийгээд хугацаа нь болохоор сайтар хөргөж бүтэн байдлыг шалгадаг. Дараа нь тус тусад нь уутлаад, ижлээр нь нэгтгэж бэлэн болгодог.

-Та ямар хоббитой вэ. Энэ бүхнийг хийхэд ур чадвараас гадна гарын ур дүй чухал санагдсан. Хүүхэд байхдаа зургийн хичээлд сонирхолтой байв уу?

-Олон төрлийн зүйл сонирхож хийхийг хичээдэг. Хөдөлмөр, зургийн хичээлд дуртай, сайн сурлагатай хүүхэд байсан. Цүнхэндээ багаж хийж авчраад ширээ, сандалаа янзалдаг, 7-9 дүгээр ангийнхны дунд зохиогддог “Бяцхан дизайнер” тэмцээнд гурван жил дараалан түрүүлж байлаа. Одоо бодоход их сайхан дурсамж үлдэж дээ. Хүүхдүүдээ хараад гэрт байдаг учир тухайн цаг үед юу хиймээр байна, түүнийгээ баяжуулаад хийдэг.

-Та зурдаг уу?

-Өөрийнхөө хэмжээнд зурдаг. Энэхүү хос хунг акрилан будгаар зурсан. Хүүхдүүдээ хичээлд нь явуулчихаад тарах хооронд нь 3-4 цагийн дотор зурж дуусгасан. Би аливааг хийхдээ барин, тавин хийдэггүй. Тухайн үеийн сэтгэл хөдлөлдөө хөтлөгдөөд, дуу сонсох зуураа л хийчихдэг. Би зурсан зургаа олны хүртээл болгоогүй. Найз нөхдийнхөө дунд л санал, сэтгэгдлээ хуваалцдаг.

-Хүүхэлдэйн киноны дүрүүдээр төлөөлүүлэн хийсэн шатрыг тань үзсэн, харсан, худалдаж авсан хүмүүсийн сэтгэгдэл ямар байна вэ?

-Захиалагч нарын маань сэтгэгдэл тун өндөр байгаа. Хөл хорио тогтоосон эдгээр өдрүүдэд зурагт, утас олон цагаар үзэж, амьд харилцаа байхгүй болж байгаа нь тун харамсалтай. Аав, ээж нар хүүхдүүддээ цаг, зав гарган шатар тоглож, хамтдаа хөгжих боломжийг ашиглаасай гэж хүсэж байна. Тийм бодол сэтгэлтэй эцэг, эхчүүд надтай холбогдож байгаад баярладаг шүү. Анх хүүдээ шатар хийж өгсөн маань олон хүний сонирхлыг татаж, тэднийг гэр бүлтэйгээ, хүүхдүүдтэйгээ цагийг зугаатай өнгөрүүлэх шалтгаан, боломж болсонд баяртай байгаа. Эцэг, эхчүүд төдийгүй бяцхан захиалагчид маань баярласан сэтгэлээ илэрхийлж, урмыг үгс явуулж, шатар тоглож байгаа зургаа илгээж байгаа нь дараагийн шатраа бүр илүү гоё хийх урам болж байна.