Гадаад харилцааны дэд сайд Б.Мөнхжин Монгол Улсын гадаад худалдааны гол боомт болох Замын-Үүд боомтод ажиллажээ. Энэ хүрээнд Замын-Үүд боомтын шинэчлэлийн ажил, боомтын ачаа тээврийн терминалын барилга угсралтын ажлыг гүйцэтгэж байгаа компанийн төлөөлөлтэй уулзав. Энэхүү шинэчлэлийн төсөл хэрэгжсэнээр зорчигчдын болон бараа дамжин өнгөрөх хугацаа багасаж, худалдаа эрхлэгчдийн зардал багасах юм. Шинэчлэлийн төсөл 2021 оны IV улирал гэхэд бүрэн дуусаж, үйл ажиллагаагаа эхлүүлэх хуваарьтай аж.

Ингэснээр нийт талбай найм, өдөрт нэвтрэх зорчигчийн тоо дөрөв, том оврын ачаа тээврийн хэрэгслийн тоо гурав, суудлын тээврийн хэрэгслийн тоо долоо дахин нэмэгдэнэ. Зорчигч, тээврийн хэрэгсэл хилийн боомтоор түргэн шуурхай нэвтрэн, ая тухтай үйлчлүүлэх боломж бүрдэж Монгол Улсын гадаад худалдаа, эдийн засгийн хөгжилд томоохон нөлөө үзүүлнэ.

Мөн дэд сайд Б.Мөнхжин Замын-Үүд чөлөөт бүсэд ажиллав. Тэрбээр чөлөөт бүсийн удирдлагатай уулзаж, гадаад худалдааг нэмэгдүүлэх, Монголд үйлдвэрлэсэн бараа бүтээгдэхүүний экспортын хэмжээг нэмэгдүүлэхэд чөлөөт бүсийн үүрэг чухал  болохыг тэмдэглэв.