УИХ-ын гишүүн асан Б.Ундармаад холбогдох, улс төрд нөлөө бүхий эрх мэдлээ ашиглан ЖДҮХС-аас нэн хөнгөлөлттэй нөхцөлөөр зээл авч, хамаарал бүхий аж ахуйн нэгждээ олгуулж, албан тушаалаа урвуулан ашигласан хэргийг гуравдугаар сарын 31-нд эрүүгийн хэргийн давж заалдах шатны шүүх дахин хэлэлцэж түүнийг 40 сая төгрөгөөр торгохоор шийдвэрлэсэн байна. Тэрбээр өөрийн хамаарал бүхий “Доктор МЭИК” ЖДҮХС-гаас 700 сая төгрөгийн зээл авсан хэрэгт холбогдсон юм.

Баянзүрх дүүргийн Эрүүгийн хэргийн анхан шатны шүүхээс түүний нийтийн албанд томилогдох эрхийг зургаан жилээр хасаж, хоёр жил зургаан сараар хорих ялаар шийтгэсэн аж. Гэтэл өнгөрсөн оны аравдугаар сард  нийслэлийн Эрүүгийн хэргийн давж заалдах шатны шүүхээс түүнд оноосон ялыг өөрчилж, 40 сая төгрөгөөр торгох шийдвэр гаргажээ. Харин үүнд прокурорын газраас эсэргүүцэл бичсэн байна. Тиймээс давж заалдах шатны шүүх дахин хэлэлцэж, түүнийг хүнд мэс засалд орсон баримтад тулгуурлаж улсад учруулсан хохирлоо төлсөн, гэм буруугаа хүлээсэн гэх үзүүлэлтээр түүнд хорих ял оноолгүй 40 сая төгрөгөөр торгохоор дахин шийдвэрлэсэн байна.