Топ модель Х.Бадамгэрэл “Miss Grand International 2026” тэмцээний албан ёсны цахим хуудсанд Amber Yuhan нэртэй оролцогчийг Монгол Улсын төлөөлөгчөөр бүртгэж, төрийн далбаа болон “Mongolia” нэр бүхий туузтайгаар оролцуулж буй асуудлаар тайлбар шаардсан байна.

     Тэрбээр энэ талаар өөрийн цахим хуудсаар дамжуулан мэдээлж, уг оролцогч Монгол Улсын иргэн мөн эсэх, Монгол Улсыг төлөөлөх ямар хууль ёсны үндэслэлтэй, ямар сонгон шалгаруулалтаар тэмцээнд оролцож байгаа, Монголын “Miss Grand International”-ийн лицензийг хэн эзэмшдэг талаар албан ёсны, ил тод мэдээлэл нийтэд танилцуулагдаагүй гэжээ.

     Мөн Х.Бадамгэрэл өөрийгөө “ANDRA Academy”-ийн үүсгэн байгуулагч, Монголын гоо сайхан, загварын салбарт 20 гаруй жил ажилласан мэргэжилтэн бөгөөд 2015 оноос хойш олон улсын тэмцээнд Монголын оролцогчдыг бэлтгэж ирсэн ментор хэмээн танилцуулаад, дээрх асуудлаар “Miss Grand International” байгууллагад албан шаардлага бүхий цахим шуудан илгээсэн байна.

     Тэрбээр уг мэдээллийг олон нийтэд түгээж, холбогдох байгууллагаас албан ёсны тайлбар авахад дэмжлэг үзүүлэхийг хүсжээ.