Цагдаагийн ерөнхий газрын Мэдээлэл, шуурхай удирдлагын төвд дохионы хэлний хэлмэрчийг 24 цагаар ажиллуулж эхэлснээр сонсгол, хэл ярианы бэрхшээлтэй иргэд яаралтай тусламж, үйлчилгээг шуурхай авах боломж бүрджээ.

    Тус төв нь иргэдээс гэмт хэрэг, зөрчил, осол, гал түймэр, эмнэлгийн яаралтай тусламж, гэр бүлийн хүчирхийллийн талаарх дуудлага, мэдээллийг 101, 102, 103, 105 тусгай дугаараар хүлээн авч, холбогдох байгууллага, нэгжид шуурхай дамжуулан хүргэдэг. Өдөрт дунджаар 4800 орчим дуудлага, мэдээлэл хүлээн авч байна.

    Цагдаагийн байгууллага төрийн үйлчилгээг иргэн бүрд тэгш, хүртээмжтэй хүргэх, хөгжлийн бэрхшээлтэй иргэдийн яаралтай тусламж, үйлчилгээ авах боломжийг нэмэгдүүлэх зорилгоор Хөгжлийн бэрхшээлтэй хүний эрхийн тухай хуулийн 11.4 дүгээр зүйлд заасан шаардлагын хэрэгжилтийг ханган ажиллаж байгаа аж.

    Үүний хүрээнд сонсголын бэрхшээлтэй иргэд 102 тусгай дугаарт зурвас илгээхээс гадна “102 Police” аппликейшнээр дүрст дуудлага хийж, дохионы хэлний хэлмэрчийн тусламжтайгаар дуудлага, мэдээлэл өгөх боломжтой болжээ.

    Ингэснээр сонсголын болон хэл ярианы бэрхшээлтэй иргэдийн яаралтай тусламж авах хүртээмжийг нэмэгдүүлж, төрийн үйлчилгээний тэгш, хүртээмжтэй байдлыг хангахад чиглэсэн бодит боломж бүрдэж байгаа аж.