Монгол Улсын Ерөнхий сайд Н.Учралын ивээл дор “Эрүүл мэндийн салбарын хөгжлийн түлхүүр-Сумын эрүүл мэндийн төв” үндэсний чуулган болжээ. Чуулганд сум, тосгоны эрүүл мэндийн төвийн эмч, эмнэлгийн мэргэжилтнүүд оролцож, анхан шатны тусламж, үйлчилгээний бодлого, чанар, хүний нөөц, эмч, мэргэжилтнүүдийн тогтвортой ажиллах нөхцөлийн талаар хэлэлцсэн байна.

      Улсын хэмжээнд сумын эрүүл мэндийн 307 төв, сумын зургаан нэгдсэн эмнэлэгт нийт 8560 эмч, мэргэжилтэн ажиллаж байна. Ерөнхий сайд Н.Учрал чуулганд оролцож, мэндчилгээ дэвшүүлэн хэлсэн үгэндээ сумын эрүүл мэндийн төвийг хөгжүүлж, бэхжүүлэх нь эрүүл мэндийн тогтолцооны үндэс суурийг бататгах чухал зорилт болохыг онцолжээ. Тэрбээр “Анхан шатны тусламж, үйлчилгээ сайн байхын хэрээр монгол хүнээ өвчнөөс урьдчилан сэргийлэх, эрт илрүүлэх, эрүүл, зөв амьдрах ухаан, хэвшлийг дэлгэрүүлж чадна” гэв.

      Мөн Засгийн газрын “ЧӨЛӨӨЛЬЕ” үндэсний санаачилгын хүрээнд эрүүл мэндийн байгууллагын анхан шатны бүртгэлийн 274 төрлийн маягтыг 163 болгон цөөлсөн бөгөөд нийт маягтын тоог 40 хувиар бууруулахаар ажиллаж байгааг мэдээлсэн байна. Энэ талаар Ерөнхий сайд “Эмч хүн алтан цагаа албаны цаасанд биш, ард түмэндээ зориулах ёстой” хэмээн онцолжээ. Түүнчлэн эмч, сувилагч, эмнэлгийн мэргэжилтнүүдийг хөдөө, орон нутагт тогтвортой ажиллуулахын тулд цалин хөлс, нийгмийн баталгаа, ажлын орчин, мэргэжлийн тасралтгүй хөгжлийг дэмжсэн цогц бодлого шаардлагатайг тэмдэглэв. Мөн анхан шатны тусламж, үйлчилгээнд эмч, сувилагчийн зохистой харьцааг бүрдүүлэхэд анхаарч, сувилагчдыг дэмжих нь сувилахуйн тусламжийг иргэдэд хүртээмжтэй хүргэхэд чухал болохыг хэлжээ. Засгийн газар “Гэрт ойрхон эмч, ойрхон эм” бодлогыг сум, тосгонд хэрэгжүүлэхээр ажиллаж байгаа бөгөөд энэ нь иргэдийн цаг, зардлыг хэмнэхийн зэрэгцээ лавлагаа шатлалын эмнэлгүүдийн ачаалал, хүлээгдлийг бууруулах ач холбогдолтойг Ерөнхий сайд онцолсон юм.

         Мөн орон даяар хүүхдийн эрт илрүүлэг, эмчилгээ, тусламж үйлчилгээг өргөжүүлэх, эрүүл амьдралын зөв дадлыг бага наснаас нь төлөвшүүлэх ажлын бэлтгэлийг хангаж байгааг мэдээлсэн аж. Тэрбээр хүүхдийн эрүүл мэнд нь зөвхөн эмч, эмнэлгийн ажилтнуудын бус, бүх салбар, эцэг эх, иргэн бүрийн хамтын үүрэг, хариуцлага болохыг онцлоод, сумын эрүүл мэндийн төв, сургууль, цэцэрлэг, эцэг эх, орон нутгийн удирдлагууд хамтран ажиллах шаардлагатайг тэмдэглэжээ.

        Ерөнхий сайд Н.Учрал “Монгол Улсын Засгийн газар олон жилийн дуусдаггүй яриаг дуусгаж, үр дүн гаргахын төлөө ажиллаж байна. Сумын эрүүл мэндийн төвийн хөгжлийн шинэ замын зураг өнөөдөр, одоо, энэ танхимаас гарах учиртай” хэмээн хэлжээ.