Баруун бүс нутаг нь газар хөдлөлт, зуд, үер, хүчтэй салхи, шороон болон цасан шуурга зэрэг байгаль, цаг уурын гаралтай гамшиг, аюулт үзэгдэлд өртөх эрсдэл өндөртэй. Мөн алслагдсан байршил, хүн амын суурьшил, дэд бүтцийн онцлогоос шалтгаалан гамшиг, ослын тохиолдол, давтамж нэмэгдэхийн зэрэгцээ эрсдэлийг нэмэгдүүлэх нөхцөл бүрдэж байгаа аж.

    Иймээс Увс аймагт зохион байгуулж буй “УВС-2026” гамшгийн үеийн хариу арга хэмжээний сургалт, дадлагын хүрээнд аймгийн бүх шатны удирдах бүрэлдэхүүн, мэргэжлийн анги, гамшгаас хамгаалах алба болон Завхан, Говь-Алтай, Баян-Өлгий, Ховд аймгийн холбогдох байгууллагуудын удирдлагууд бодит цагийн нөхцөл байдалд суурилсан штабын удирдлагын дадлага хийжээ.

   Дадлага сургуулийн үеэр шуурхай штабын үйл ажиллагааг зохион байгуулах, мэдээлэл боловсруулах, дамжуулах, үүрэг гүйцэтгэлийг төлөвлөх, баримт бичиг болон зураглал боловсруулах зэрэг бодит үйл ажиллагааг хэрэгжүүлэв. Ингэснээр аймгийн гамшгаас хамгаалах төлөвлөгөөг тодотгож, гамшгийн үед байгууллага хоорондын уялдаа холбоо, хамтын ажиллагааг сайжруулахад ач холбогдолтой юм.

    Мөн дадлага сургуулийг гамшгаас хамгаалах сургалт, дадлагын цахим систем ашиглан зохион байгуулсан нь онцлог байлаа. Тус системээр өгөгдсөн нөхцөл байдалд хэрэгжүүлсэн хариу арга хэмжээний явц, үр дүнг бодитоор харж, үнэлэн дүгнэх боломж бүрдсэн байна.

   Ийнхүү “УВС-2026” сургалт, дадлага нь гамшгийн үеийн шийдвэр гаргалт, шуурхай штабын ажиллагааг бодит нөхцөлд туршихын зэрэгцээ бүсийн хэмжээнд байгууллага хоорондын харилцан ажиллагааг сайжруулахад чиглэж байна.