Монгол, АНУ-ын хамтарсан “УВС-2026” гамшгийн үеийн бэлэн байдал, хариу арга хэмжээний сургалт, дадлагын хүрээнд Увс аймгийн хуучин гурилын үйлдвэрийн байршилд буюу хээрийн нөхцөлд техникийн дадлага сургуулилт зохион байгуулжээ.

    Дадлага сургуулилтаар гал түймэртэй тэмцэх, хот доторх болон өндрөөс эрэн хайх, эмнэлгийн тусламж үзүүлэх, химийн ослын үеийн ажиллагаа, дрон ашиглах болон кибер аюулгүй байдлын чиглэлээр дадлага хийсэн юм. Мөн Хяргас нуурын сургалтын төвд уснаас эрэн хайх, аврах ажиллагааны дадлага сургуулилтыг зохион байгуулсан байна.

    Сургалтыг АНУ-ын Аляскийн Үндэсний гвардын сургагч багш нар удирдан явуулж, ОБЕГ-ын харьяа Үндэсний аврах бригад, 119, 113, 111 дүгээр анги болон баруун бүсийн Баян-Өлгий, Говь-Алтай, Завхан, Ховд, Увс аймгийн Онцгой байдлын байгууллагын 100 орчим алба хаагч хамрагджээ.

    Техникийн сургалт, дадлага нь аврагчдын мэргэжлийн ур чадварыг дээшлүүлэх, удирдах албан тушаалтан болон томилгоот бие бүрэлдэхүүний гамшигтай тэмцэх арга, тактикийг сайжруулах, орон нутгийн гамшгийн үеийн бэлтгэл, бэлэн байдлыг хангахад чиглэгдсэн аж.

    Түүнчлэн оролцогчид харилцан туршлага солилцож, гамшгийн үед хамтран ажиллах чадавх, уялдаа холбоогоо сайжруулсан нь сургалт, дадлагын нэг чухал үр дүн байв.