Өнгөрсөн өдрүүдэд “Бээжин-2022” өвлийн олимпод оролцох баг, тамирчдын өмсгөл дээр "Mongolia" гэж бичихийг "Moncolia" гэж буруу бичсэн, төсвөөс зардлыг нь батлаагүй учир “Хүннү Эйр” компаниас тамирчдын Бээжин орох нислэгийн зардлыг даасан гэх мэдээлэл цахим сүлжээгээр түгээд байгаа. Бид үүнтэй холбоотойгоор МҮОХ-ны Ерөнхий нарийн бичгийн дарга Э.Бадар-Ууганаас тодрууллаа.

Тэрбээр “Хэд хоногийн өмнө “Бээжин-2022” өвлийн олимпод оролцох тамирчдын өмсгөлийн бэлэн болоогүй байх үеийн зургийг цахим сүлжээнд цацсан. Өөрөөр хэлбэл, өвлийн олимпод оролцохоор Бээжин очоод байгаа баг, тамирчдын өмсгөл асуудалгүй байгаа гэсэн үг.

          Өвлийн олимпын баг, тамирчид “Бээжин-2022”-т оролцохоор Бээжинд очоод байгаа. Олимпын баг, тамирчид “Хүннү Эйр” компанийн онгоцоор ниссэн. Харин цахим сүлжээнд мэдээлээд байгаа шиг “Хүннү Эйр” компани тамирчдын зардлыг бүрэн даасан, зардлыг нь төсвөөс баталж өгөөгүй гэдэг нь худал. Үнэн хэрэгтээ Монгол Улсаа төлөөлж, “Бээжин-2022” өвлийн олимпод оролцох тамирчид явж ч чадахааргүй нөхцөл байдалд хүрээд байсан. Тийм учраас МҮОХ-оос Олон улсын олимпын хороотой холбогдож, тусгай онгоцоор хүрэх зөвшөөрөл авсан. “Миат”-тай холбогдож үзэхэд маш өндөр үнэ хэлсэн учир баг, тамирчдыг “Миат”-ын онгоцоор нисгэх боломжгүй болсон. Харин “Хүннү Эйр” компаниас “Манайд Бээжингийн олон улсын нисэх буудалд буух эрх байгаа” гэж мэдэгдэж, мөн боломжийн үнэ хэлсэн учир өвлийн олимпын баг, тамирчид “Хүннү Эйр” компанийн онгоцоор ниссэн. Түүнээс биш “Хүннү Эйр” компаниас тамирчдыг зардлыг дааж, төсвөөс гаргаж чадаагүй зүйл огт үгүй. Хуульдаа хүртэл “Олимпын наадамд оролцох баг, тамирчдын зардлыг төсвөөс гаргана” гэж тусгасан байдаг.

          Мөн өвлийн олимпын багт тамирчид, МҮОХ-ноос гаднах хүмүүс хамт явж байгаа гэж цахим сүлжээгээр шүүмжлээд байна. “Бээжин-2022” өвлийн олимпод оролцох баг болон хэвлэл мэдээллийн салбарынхан тусдаа эрхээ авсан юм. Олимпод оролцох багт тамирчин Б.Ачбадрах, А.Энхтуул, дасгалжуулагч Б.Энх-Амгалан болон эмч, МҮОХ-ны мэргэжилтэн зэрэг 10 орчим хүн явж байгаа. Мөн “Бээжин-2022” өвлийн олимпыг шууд дамжуулахаар эрх авсан хэвлэл мэдээллийн баг мөн 10 орчим хүний бүрэлдэхүүнтэй байгаа юм” гэлээ.