Хөл хориотой наадмаар сэргээш хавтгайрсан уу?

Б. Цогтбаяр:
Соёл урлаг- Спорт

2020-09-11, 1322

Үндэсний их баяр наадмын үндэсний бөхийн барилдааны шөвгийн 16 бөхөөс допингийн шинжилгээ авч, БНСУ-ын Шинжлэх ухаан технологийн институтын сэргээшийн хяналтын лабораторт шинжлүүлдэг. Тэгвэл энэ жилийн улсын баяр наадмын үндэсний бөхийн шөвгийн 16 бөхийн сэргээшийн шинжилгээний хариу БНСУ-аас иржээ.

Улмаар улсын цолтой гурван бөхөөс допинг илэрсэн, тэдний дунд үзүүр, түрүүнд баригдсан бөхчүүд багтсан гэх мэдээлэл цахим орчинд тараад байна. Одоогоор нэр холбогдсон дээрх бөхчүүдээс Улсын аварга П.Бүрэнтөгсөөс бусад нь ямар нэгэн тайлбар хийгээгүй байна.

Харин өнгөрсөн улсын баярын наадмын үндэсний бөхийн барилдаанд түрүүлсэн Улсын аварга П.Бүрэнтөгс өөрийн цахим хаягаараа дамжуулан “Сэргээшийн эсрэг үндэсний төвөөс надад ямар нэг хариу ирүүлээгүй байна. Гэтэл зарим сайтуудаар үзүүр, түрүүний бөхөөс допинг илэрсэн гэх мэдээлэл тарааж байгааг гайхаж байна. Надад ямар нэг айх зүйл алга” гэж мэдэгдээд байна.

Өнгөрсөн жилийн Үндэсний их баяр наадамд түрүүлсэн Э.Оюунболдоос сэргээш илэрч, жил тойрон маргааны сэдэв болсон. Улмаар өнгөрсөн зургадугаар сард түүний Улсын аварга цолыг нь хураах, барилдах эрхийг нь хоёр жилээр хасах шийдвэр гарч байсан билээ.

Допинг буюу сэргээшийн төрлийн бодис хэрэглэсэн бөхчүүдийн хүч чадал нэмэгдэж, ядарч цуцахгүй болдог бөгөөд сүүлийн үед энэ төрлийн бодисны хэрэглээ хавтгайрсан гэх яриа бөхчүүд, бөх сонирхогчдын дунд гарах болсон. Жил бүрийн үндэсний баяр наадмын дараа 2-3 бөхөөс сэргээш илэрдэг нь дээрх яриаг баталж буй.

Ямартай ч одоогоор Үндэсний бөхийн холбоо, Допингийн эсрэг үндэсний төвөөс албан ёсны мэдэгдэл хийгээгүй байна. Сэргээш илэрсэн бөхчүүдийн нэрийг албан ёсоор зарласны дараа бид дэлгэрэнгүй мэдээллэх болно.

Хөл хориотой наадмаар сэргээш хавтгайрсан уу?

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 2

Сэтгэгдэл үлдээсэн: 2020-09-11 17:50:15

??????: Сэргээш хаана зараад бгаа бөх болмоор б
Сэтгэгдэл үлдээсэн: 2020-09-11 13:34:40

?????: Үнэн бол хэцүү л байнаа, Гэхдээ аавын хүүхдүүд адилхан бөхчүүдийг алаг үзэхгүйгээр арга хэмжээ авах байлгүй дээ. Бүх зүйлд шударга хандах хэрэгтэй