• Өнөөдөр 2023-06-03

Л.ЭНХРИЙЛЭН: Эмээдээ хөтлүүлсэн алдрайхан охин Спортын төв ордон руу орж байлаа. Тэр цагаас амжилтын төлөөх он цаг эхэлсэн

2023-05-28,   1629

Эргэлт.мн мэдээллийн сайтын энэ удаагийн “Эр бор харцага” буланд жүдо бөхийн тамирчин ОУХМ, дэлхийн хошой хүрэлт медальт Л.Энхрийлэн оролцлоо. Хүчит аваргуудын өлгий нутаг Сэлэнгэ аймгаас бөх болохоор нийслэл хотыг зорьж, эмээтэйгээ хамт Спортын төв ордны хаалгыг татаж Монгол Улсын гавьяат дасгалжуулагч Ц.Шийрэв багшийн шавь болсноор тамирчин болох замнал нь эхэлжээ. Энэ  нь түүний жүдо бөх гэх айл руу алхан орсон үе бөгөөд дэлхийн дэвжээнд эх орныхоо тугийг мандуулах эхлэл болсон байна. Ингээд уншигч үзэгч та бүхэн дэлхийн аваргын хүрэл медальт Л.Энхрийлэнтэй хийсэн ярилцлагыг хүргэж байна. 

-Юуны түрүүнд дэлхийн аваргын хошой хүрэл медаль хүртэж, бөхөд хайртай монголчуудынхаа магнайг тэнийлгэсэнд баяр хүргэе. ДАШТ-ээс хоёрдох хүрэл медалиа хүртсэн тухайн үеийн мэдрэмжээс нь хөөрөлдөөнөө эхлэх үү?

                  -Баярлалаа. Энэхүү медалийг хүртсэндээ маш их баяртай. Өөрийн болон баг хамт олон багш, гэр бүлийнхээ хамтын хүч хөдөлмөр, хөлсөөр энэхүү медалийн эзэн боллоо. Намайг цаг ямагт дэмжиж, тусалж байдаг бүх хүнд баярлалаа гэж хэлмээр байна. Медаль авах мэдрэмж хамгийн гайхалтай. Тэр үеийн мэдрэмжийг үгээр илэрхийлж хэлнэ гэдэг бараг л боломжгүй. Бүх зүйл дүүрэн, баяртай, бахархалтай байдаг. Нэг үгээр бол хамгийн сайн сайхан бүхэн сэтгэл дотор минь дүүрдэг гэх юм уу даа.

-Анх хэдэн настайгаасаа жүдо бөхийн спортоор хичээллэж эхэлсэн. Энэ спортоор хичээллэж суралцахын гол шалтгаан нь юу байв. Энэ талаар сайхан хууч дэлгэнэ гэж бодож байна?

                  -2011 онд эмээтэйгээ Спортын төв оронд ирж, Монгол Улсын гавьяат багш Ц.Шийрав багшийн шавь бэлтгэл хийж эхэлсэн. Тэр л үеэс  энэ ордондоо өдөр бүр бэлтгэл хийж, багш нараасаа суралцаж, амжилт гаргаж, эх орныхоо нэр, тугийг дэлхийд мандуулах зорилготой болсон. Өдгөө 12 жил энэ ордондоо, энэ л зааландаа бэлтгэл хийж, спортын хүн болохоор зорьжээ. Энэ заал минь яг гэр орон шиг минь хамгийн дотно нандин. Хамт бэлтгэл хийж байгаа ах эгч, дүү нар маань элгэмсэг дотно яг л гэр бүлийн гишүүд шиг байдаг. Эндээс л дэлхийд алдартай олон сайхан тамирчин төрөн гарсан. Цаашдаа ч гарсаар байх болно.

 

Ер нь тамирчин хүн өөр өөрийнхөө өрсөлдөгч байдаг

-Жүдо бөхийн спорт нь хүнд ямар төлөвшил, хүмүүжлийг олгодог вэ?

                  -Жүдо бол хүндлэлийн спорт. Хүнийг хүндэлж, хайрлаж сурахаас л энэ спорт эхэлдэг. Бэлтгэл хийхдээ багш, ах эгч нартаа ёслох байдаг. Нэг үгээр бол жүдо маш их хүндлэл дор оршдог. Энэ нь бусад спортоос онцлог.  Үүнээс гадна тамирчин хүнд сэтгэл зүй хамгийн чухал. Ер нь тамирчин хүн өөр өөрийнхөө өрсөлдөгч байдаг. Би чадахгүй гэж өөрийгөө түгжиж, хүнд хэцүү байдалд оруулдаг юм билээ. Энэ бол маш буруу. Тиймээс би чадна гэдэг сэтгэл зүйтэй байх ёстой.

                  Жүдо бол миний хийж байгаа хамгийн дуртай зүйл. Энд л миний амьдралын утга учир оршиж байгаа байх. Жүдо миний сонирхол байсан одоо ажил болсон. Дуртай ажлаа хийж байна гэдэг бол хамгийн том аз жаргал.

-Олон улсын тэмцээнд өрсөлдөх, дотоодоо өрсөлдөх мэдээж ялгаатай болов уу. Тухайлбал, олон улсын тэмцээнд улс орнуудын шилдэг тамирчид, дэлхийн өндөр чансаатай бөхчүүд барилдана. Харин дотоодоо өдөр бүр хамт бэлтгэл хийдэг нэгнийхээ барилдааныг гарын таван хуруу шигээ мэддэг найз нөхөд, ах, эгч, дүү нартайгаа барилддаг байх. Тэгэхээр сонирхолтой яриа дэлгэнэ гэж бодож байна л даа?

                  -Хамгийн том өрсөлдөөн дэлхийн дэвжээн дээр байдаг. Ер нь жүдо бөх дэлхийн бүх улсад өндөр түвшинд хөгжиж байгаа спорт. Тиймээс өрсөлдөгчид нэг нэгнээ мэднэ. Барилдааныг нь судална. Мөн өдөр бэлтгэл хийдэг тамирчинтай дэвжээнд таарахад том өрсөлдөөн гардаг. Нэгнийхээ барилдааныг мэдэж байгаа учраас алдаа гаргаж болохгүй. Нэг л алдаа гаргах юм бол ялагдана. Хэн ч ялагдахыг хүсэхгүй жинхэнэ гал гарсан өрсөлдөөн бий болдог доо.

 Бага байхдаа компанийн захирал болно гэж мөрөөддөг байсан. Яах вэ хүүхэд бүхэн л мундаг хүн болохыг хүсдэг шүү дээ

                  Миний хувьд ялах, ялагдах гэхээсээ илүүтэй дуртай зүйлээсээ хамгийн сайхан мэдрэмж авах үнэхээр гоё байдаг. Шинэ мэх сураад тэр мэхээрээ өрсөлдөгчөө ялах тэр үеийн мэдрэмж үнэхээр гоё. Ер нь хүн дуртай юмаа хийнэ гэдэг л хамгийн сайхан.

-Анх Спортын төв ордонд хөдөлж ирээд Ц.Шийрэв багшийн шавь болгож, их спорт руу хөтөлсөн эмээ нь охиноороо их бахардаг нь мэдээж. Томоохон тэмцээн уралдаанд орж, амжилт гаргаад ирэхэд эмээ нь юу гэж хэлдэг вэ?

                 -Эмээ минь үргэлж миний үнэнч дэмжигч. Намайг ялсан ч, ялагдсан ч ард минь байдаг. Үргэлж надад тусалж, дэмжиж дэм өгдөг нэг номерын хүн. Энэ завшааныг ашиглаад эмээдээ сэтгэлийн үгээ хэлж болох уу?

-Бололгүй яах вэ?

             -Эмээдээ маш их хайртай шүү. Таныхаа хүчээр өдий зэрэгтэй яваа шүү охин нь гэж хэлмээр байна.

 

тэр жаргалтай үеийг үгээр илэрхийлэхийн аргагүй төгс байна

-Хэрвээ Л.Энхрийлэнгийн хувьд жүдо бөхийн тамирчин болоогүй бол ямар мэргэжилтэй хүн болох байсан бэ?

                  -Энэ талаар ёстой бодож үзээгүй юм. Үнэхээр мэдэхгүй, төсөөлөх ч үгүй байна даа. Бага байхдаа компанийн захирал болно гэж мөрөөддөг байсан. Яах вэ хүүхэд бүхэн л мундаг хүн болохыг хүсдэг шүү дээ. Тэр л зарчмаар захирал болно гэж мөрөөддөг байсан байх. Гэтэл одоо дэлхийн аваргын хошой хүрэл медальтай тамирчин болчихсон байна. Тийм болоод ч тэр үү өөр ямар нэгэн мэргэжилтэй Л.Энхрийлэнг төсөөлөхгүй байна.

-Аав,ээж, ах дүүс дотор нь барилддаг хүн байгаа юу?

                  -Аав, ээжийн удамд бараг л бөх хүн байгаагүй. Гэхдээ өвөө маань чөлөөт бөхөөр барилддаг байсан юм билээ.

-2022 оны ДАШТ-ий хүрэл медалийг эх орондоо авчирсан шүү дээ. Тухайн үед медалийн тавцан дээр зогсоход ямар мэдрэмж байсан бэ?

                  -Олон жил жүдогоор барилдахдаа дэлхийн медальтан болохын тулд бүхнээ зориулсан. Энэ зорилгоо 2022 онд ДАШТ-ээс хүрэл медаль хүртэж биелүүлсэн. Тухайн үед дэлхийн медаль хүртсэндээ итгэж чадахгүй байсан. Одоо ч тэр жаргалтай үеийг үгээр илэрхийлэхийн аргагүй төгс байна.

-2022 оны ДАШТ-д маш хүнд барилдаанууд хийсэн. Хэр ядарч, цуцаж байв?

                  -Барилдааны төлөвлөгөө бол нэмэлт цагт орохгүй, үндсэн цагтаа дуусгах байлаа. Мэдээж зорилго бол алтан медаль байсан. Канадын Дэгүчитэй нэмэлт цагаар барилдаж ялсан. Хүнд барилдаан болж дууссан. Үргэлжлүүлээд Израилын тамирчинтай барилдахдаа сэргэж амжаагүй. Гэхдээ дараа нь хүрэл медалийн төлөө барилдаанд ялсандаа баяртай байна. Ер нь бүхнээ зориулж барилдсан. Баярласандаа өөрийн эрхгүй уйлсан.

                  Тэрбээр жүдогоор хичээллэж эхэлснээсээ хойш зургаан сарын дараа Улаанбаатар хотын аварга шалгаруулах тэмцээнээс мөнгөн медаль хүртэж, анхны амжилтын гаргаагаа эхлүүлж байжээ. Харин 2013 онд “Боржин кап” тэмцээнээс анхны алтан медалиа хүртсэн бол 16 насандаа насанд хүрэгчдийн УАШТ-ээс медаль хүртэж, 2016 онд 17 настайдаа “Чингис хаан” гран при тэмцээн 57 кг-ын жингийн дэлхийн шилдгүүдийг өвдөг шороодуулсаар эх орныхоо дэвжээнд түрүүлж, олон улсын тэмцээний анхны түрүүгээ хүртсэн түүхтэй.

                  Л.Энхрийлэн их бяртай, эршүүд, олон талын барилдаантай. Баруун, зүүн аль ч талаараа барилдаж чаддаг онцлогтой нэгэн. Багаасаа амьдралын хатуу, хүтүүг үзчихсэн, тэвчээртэй нэгэн. Авьяасаа хөдөлмөрөөр тордож амжилтад хүрч байна. Тэрбээр сууж үүрэх, хөл тавих дархан мэхтэй. Насанд хүрэгчдийн ДАШТ-ээс гадна өсвөр, залуучуудын ДАШТ-ээс мөнгөн медаль авч байсныг бөх сонирхогчид андахгүй биз ээ. Л.Энхрийлэн одоо дэлхийн дэвжээнд хоёр жил дараалан гаргасан амжилтаа хадгалан олимпын наадамд ахиулах, олимпын медальтан, аварга болохын төлөө зүтгэж, Парис 2024 олимпын наадамд эх орныхоо төрийн дууллыг эгшиглүүлэхээр бэлтгэлээ хийж байна.


Л.ЭНХРИЙЛЭН: Эмээдээ хөтлүүлсэн алдрайхан охин Спортын төв ордон руу орж байлаа. Тэр цагаас амжилтын төлөөх он цаг эхэлсэн
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 1
  • Сэтгэгдэл үлдээсэн: 2023-05-29 16:22:41
    Bold Ch: Бахархан дууриах шилдэг жүдочин. Олимпын медаль хүртэнэ.
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188